शिंदे गटाचे १६ आमदार पात्र, नार्वेकरांचा निकाल येताच आदित्य ठाकरेंची प्रतिक्रिया; म्हणाले, “देशासाठी हे मोठे संकेत…”

आदित्य ठाकरे म्हणाले, शिंदे गटाला मूळ राजकीय पक्ष ठरवल्याने यापेक्षा लोकशाहीची हत्या कोणतीही ठरू शकत नाही. आजचा दिवस महत्त्वाचा आहे. देशासाठी हे मोठे संकेत आहेत. २०२४ मध्ये अशी गद्दारी आणि राजकारण कायदेशीर झालं तर आपलं संविधान बदललं जाईल. भाजपाला संविधान बदलायचंच आहे. बाबासाहेबांनी लिहिलेलं संविधान भाजापाला मान्य नाही हे स्पष्ट होईल.

पक्षप्रमुखाला पदावरून काढण्याचा अधिकार नसतो, असं निरिक्षण राहुल नार्वेकरांनी नोंदवलं. त्यावरून आदित्य ठाकरे म्हणाले, जेवढी वर्षे राहुल नार्वेकर आमच्या पक्षात होते तेव्हा ते कोणत्या पक्षप्रमुखाचे आदेश घेत होते? एबी फॉर्म कोणाकडून घेत होते? दिवसाढवळ्या लोकशाहीची हत्या गेल्या ७५ वर्षात पाहिली नाही.

दरम्यान, विधानसभा अध्यक्षांनी बोलावलेल्या उलट तपासणी उद्धव ठाकरे गैरहजर राहिले, असाही उल्लेख राहुल नार्वेकरांनी केला. त्यावर ते म्हणाले, आता खोके सरकारची उलटतपासणी करावी लागेल. सर्वोच्च न्यायालयाकडून आता अपेक्षा आहेतच, पण त्याहीपेक्षा जास्त अपेक्षा जनतेकडून आहे.

हेही वाचा >> “खरी शिवसेना एकनाथ शिंदेंचीच!” उद्धव ठाकरेंना झटका, राहुल नार्वेकरांचा मोठा निर्णय

या निर्णयाविरोधात कायदेशीर लढाई लढली जाईल

विधानसभा अध्यक्षांनी दिलेल्या निर्णयाविरोधात कायदेशीर लढाई लढली जाईल. असा इशारा देतानाच ‘आम्ही सर्व व्हिडिओ रेकॉर्डिंग निवडणूक आयोगाला दिलेली आहे, असं असतानाही अशा प्रकारचा निर्णय येतो हे धक्कादायक आहे. जगाला आता कळलंय की आपल्या देशात लोकशाहीची हत्या झाली आहे. देशात हिटलर शाही सुरू झालेले आहे. आणि या अन्यायाविरुद्ध लढत राहणार’ , असा निर्धार आदित्य ठाकरेंनी व्यक्त केला.

राहुल नार्वेकर काय म्हणाले?

खरी शिवसेना कुणाची हे ठरवण्याचा अधिकार मलाच आहे असं आज राहुल नार्वेकर म्हणाले. शिवसेनेची ही घटनाच हे सांगते आहे की त्यात कशी पदरचना आहे. त्यानुसारच खरी शिवसेना कुणाची आहे? याचा निर्णय घेतला आहे. २१ जून २०२२ ला शिवसेनेत दोन गट पडले. सगळ्या पुरावे, साक्षी यांचा विचार करता मी शिंदे गटाची शिवसेना हीच खरी शिवसेना आहे ही मान्यता देतो असं राहुल नार्वेकर यांनी म्हटलं आहे.

राहुल नार्वेकरांचा अंतिम निकाल…

१. शिंदे गट खरी शिवसेना आहे.

२. भरत गोगावलेंची प्रतोदपदी नियुक्ती वैध ठरते.

३. एकनाथ शिंदेंची गटनेतेपदी निवड वैध ठरते.

४. ठाकरे गटाच्या नोटीसप्रमाणे शिंदे गटाचे सदस्य संपर्काच्या बाहेर गेल्याचं सादर पुराव्यांवरून सिद्ध होत नाही.

५. सुनील प्रभूंना पक्षासाठी कोणतीही बैठक बोलावण्याचा अधिकार नव्हता. त्यामुळे शिंदे गटाच्या सदस्यांवर अपात्रतेची कारवाई करण्याची मागणी फेटाळली जात आहे.