राहाता: कर्जमाफी, पीक विमा, शेतमालाला हमीभाव द्या, अशा विविध मागण्यांसाठी प्रहार जनशक्ती पक्षाच्या नेतृत्वाखाली महाविकास आघाडी, महाराष्ट्र नवनिर्माण सेना, कम्युनिस्ट पक्ष, शेतकरी संघटना, शिवसेना (उबाठा) आणि इतर संघटनांनी एकत्र येत राहाता व शिर्डी शहरात आज बुधवारी आंदोलन केले.
शहरातील शिवाजी चौकात, नगर-मनमाड महामार्गावर आंदोलनकर्त्यांनी पत्ते खेळत आणि आसूड ओढत राज्य सरकारचा तीव्र शब्दांत निषेध केला. कृषिमंत्री माणिकराव कोकाटे यांच्या कार्यपद्धतीवर रोष व्यक्त करत, ‘शेतकरी मरतोय आणि कृषिमंत्री पत्ते खेळतोय’ असा संतप्त संदेश देत आंदोलकांनी रस्त्यावर पत्ते उधळले. आंदोलनकर्त्यांनी शिवाजी चौक ते तहसील कार्यालयावर मोर्चा नेला. तहसीलदार अमोल मोरे यांनी आंदोलनकर्त्यांचे लेखी निवेदन स्वीकारले.
