“…तर एकही जागा न मागता एनडीएला पाठिंबा देऊ”, बच्चू कडू यांचं वक्तव्य

आमदार बच्चू कडू म्हणाले, फक्त सरकार टिकावं म्हणून ग्राहकांचा आणि कांदा खाणाऱ्यांचा विचार केला. परंतु, हे सरकार शेतकऱ्यांचा विचार का करत नाही? मी एनडीएमध्ये असलो तरी शेतकऱ्यांच्या बाजूने उभा आहे. जेव्हा शेतमालाचा भाव वाढतो तेव्हा तुम्ही हस्तक्षेप करता, मग भाव कमी झाल्यावर हस्तक्षेप का करत नाही?

बच्चू कडू म्हणाले, मुळात या सरकारला निर्यात शुल्क लावण्याची काहीच गरज नव्हती. हे सरकार ऑक्टोबर, नोव्हेंबर, डिसेंबरची व्यवस्था आज करून ठेवतंय, एवढी नालायकी? का तर अटलबिहारी वाजपेयी यांचं सरकार कांद्याचे भाव वाढल्याने पडलं होतं म्हणून. आपले पंतप्रधान नरेंद्र मोदी यांचं मेक इन इंडिया, मेड इन इंडिया असं धोरण आहे. मग शेतकऱ्यांचा माल विदेशात गेला तर त्याला सफरचंदाइतका भाव मिळेल ना. या सरकारने आयात-निर्यात धोरणात स्पष्ट भूमिका घेतली पाहिजे. मग आम्ही एकही जागा न मागता पूर्ण ताकदीने एनडीएला पाठिंबा देऊ, पायात चप्पल न घालता फिरू.

दरम्यान, कांद्याचा विषय अधिक गंभीर झाल्याने आपण सरकाविरोधात आंदोलन करणार असल्याचं बच्चू कडू यांनी यावेळी सांगितलं. यावेळी बच्चू कडू यांनी प्रसारमाध्यमांनाही सुनावलं. बच्चू कडू म्हणाले, कांद्याचे किंवा शेतमालाचे भाव वाढल्यावर मीडिया त्याच्या बातम्या दाखवते, मग भाव कमी झाल्यावर का दाखवत नाही.

हे ही वाचा >> कांदा प्रश्नावर मुंडे दिल्लीत, तर फडणवीसांचा जपानहून फोन; महायुतीत श्रेयवादाची लढाई? अजित पवार म्हणाले…

आमदार बच्चू कडू म्हणाले, कधीकधी हे सरकार नामर्दासारखं वागतं. ही सरकारची नामर्दानगी आहे. सत्ता टिकावी म्हणून सरकारने केवळ ग्राहकांचा विचार केला. सरकारने खाणाऱ्यांचा विचार केला पण हे सरकार पिकवणाऱ्याचा विचार का करत नाही? सरकारने ही नालायक प्रवृत्ती सुधारली पाहिजे.