मुख्यमंत्री शिंदेंचा ‘दाढी’ असा उल्लेख करत चंद्रकांत खैरेंची टीका; जाहीर सभेतील भाषणात म्हणाले, “त्यांनी या दाढीला पकडलं आणि…”

चंद्रकांत खैरे यांनी आपल्या भाषणाच्या सुरुवातीलाच येथे जमलेले सर्वजण हे ठाकरेंच्या पाठीशी आहेत, असं सांगितलं. “इथे जे जमले आहेत ते ठाकरे परिवाराची आहे. ही जनता फक्त ठाकरे कुटुंबाला मानते. बाळासाहेब ठाकरे, उद्धव ठाकरे आणि आपण (आदित्य ठाकरे),” असं खैरे मंचावर बसलेल्या आदित्य ठाकरेंकडे पाहत म्हणाले. पुढे बोलताना, “आपण आता ज्या मार्गाने आलात त्यावर किती लोक थांबले होते हे आपण पाहिलं असेल. ठाकरे बाहेर पडले की लगेच वलय निर्माण होतं,” असं ते म्हणाले.

नक्की वाचा >> “शाहांसोबतच्या बैठकीत अडीच-अडीच वर्ष मुख्यमंत्रीपद वाटून घ्यायचं ठरलं पण उद्धव ठाकरेंनी…”; ‘मातोश्री’वरील भेटीबद्दल माजी आमदाराचा खुलासा

खैरे यांनी आपल्या भाषणामधून विद्यमान मुख्यमंत्री एकनाथ शिंदे यांच्यावरही टीका केली. भाजपा आणि शिंदे गट स्वार्थासाठी एकत्र आल्याचा आरोप खैरे यांनी केला. “स्वार्थासाठी ही मंडळी एकत्र आली. आता पडेल, मग पडेल असं ते म्हणत होते. पण सरकार पडत नव्हतं. मग त्यांनी या दाढीला पकडलं आणि सुरुवात झाली. दाढीला समजतं नाही,” अशा शब्दांमध्ये खैरे यांनी मुख्यमंत्री शिंदेंवर टीका केली. “त्यांनी एक चित्रपट काढला आनंद दिघेंवर. त्यात एक संवाद आहे, गद्दाराला माफी नाही, क्षमा नाही. मग आता आम्ही काय केलं पाहिजे?,” असा टोलाही खैरेंनी लगावला.

पाहा व्हिडीओ –

नक्की वाचा >> “एका रिक्षावाल्याकडे कोट्यवधी रुपये कुठून आले?” आदित्य ठाकरे मंचावर असतानाच जाहीर सभेत मुख्यमंत्री शिंदेंवर टीका

“आपण (उद्धव ठाकरे समर्थक) सध्या काहीच करत नाही. मला पत्रकार म्हणाले, पाच जण गेले आपण काहीच केलं नाही. पण आपण २७ तारखेपर्यंत शांत रहायचं. २७ तारखेला उद्धव ठाकरेंचा वाढदिवस आहे. आपण जोरदार पद्धतीने तो साजरा करु. पण त्याच्यानंतर मात्र आपलं काम सुरु करायचं,” असा सूचक इशारा खैरेंनी विरोधकांना दिला. तसेच खैरे यांनी सभेतील गर्दीकडे पाहून, “हे उड्या मारतात ना त्यांना सांगा पाहा युवासेनेच्या कार्यक्रमाला किती गर्दी आहे,” असंही म्हटलं.