शिर्डीत मृतदेह उघडय़ावर सात तास पडून ;नगर परिषद, पोलिसांकडून दिरंगाई, आईची केविलवाणी स्थिती

या मृतदेहाजवळ असलेल्या अंदाजे ९० वर्षे आजीने दिलेल्या माहितीनुसार ते धुळे येथील सोनवणे कुटुंब आहे. मृत व्यक्ती हा त्यांचा मुलगा असल्याचे सांगितले. भर उन्हात पडलेला मृतदेह आणि दु:खाने व्याकूळ झालेल्या आजीच्या मदतीसाठी उशिरापर्यंत कोणीच आले नाही. हे पाहून काहींनी घटनास्थळी जाऊन शिर्डी पोलीस ठाणे, शिर्डी नगरपरिषदेच्या अधिकाऱ्यांना माहिती दिली. मात्र तरीही सकाळी दहापासून उघडय़ावर पडलेला हा मृतदेह अखेर संध्याकाळी पाचला खासगी रुग्णवाहिकेतून नेऊन पुढील प्रक्रिया सुरू झाली. या वेळी माय-लेकराजवळ त्यांना धीर देण्यासाठी काही जण दिवसभर बसून होते. तर काही बघून निघून जात होते. दरम्यान, शिर्डी पोलिसांनी पाहणी केली. मात्र मदत केली नसल्याची चर्चा होती. दिवसभर नगरपरिषदेकडून कोणताही प्रतिसाद मिळत नसल्याचे या वेळी उपस्थितांनी सांगितले. काही उपस्थितांनी या आजीला शिर्डीतील द्वारकामाई वृद्धाश्रमात आश्रय मिळावा, यासाठी विचारणा केली. मात्र लेकाच्या निधनाच्या दु:खात असलेल्या आजीने मी धुळय़ाला जाईल, असे सांगत नकार दिला. या व्यक्तीचा मृत्यू कशामुळे झाला, हे शवविच्छेदनानंतर कळेल.