कराड : कृष्णा-कोयना नद्यांच्या पवित्र प्रीतिसंगमावर स्थानापन्न असलेली कराडनगरीची ग्रामदेवता, श्री कृष्णामाई देवीची सरत्या श्रावणी सोमवारची यात्रा परंपरेने उत्साही वातावरणात अन् दिमाखात साजरी झाली. पावसाच्या सरीवर सरी अंगावर झेलत हजारो भक्तगणांनी कृष्णामाईचे मनोभावे दर्शन घेताना, तिची खणा- नारळाने ओटी भरली. यात्रेमुळे अवघा कृष्णा घाट व प्रीतिसंगम परिसर कृष्णामाईच्या भक्तांनी फुलून गेला होता.
कृष्णामाई मंदिरात पहाटेपासून पूजाआर्चा, विधी, धार्मिक कार्यक्रम पार पडले. परंपरेनुसार ठिकठिकाणच्या पालख्या वाजत- गाजत मंदिरात आणल्या जात होत्या. सोमवारी पहाटेपासून पावसाने दमदार हजेरी लावली. तरी, भक्तांसह यात्रेकरुंचा उत्साह दरवेळप्रमाणे कायम दिसत होता. तसेच यात्रेतील पूजेचे साहित्य, मेवा- मिठाई, सौंदर्य प्रसाधने अन् खेळणी आदींची विक्री करणारी दालने या खेपेसही गर्दीने फुलून गेली होती.
प्रथेप्रमाणे सकाळपासून कराड आणि पंचक्रोशीसह ठिकठिकाणच्या पालख्या सवाद्य मिरवणुकांनी देवाला घेऊन कृष्णामाईच्या भेटीला आल्या होत्या. या पालखी मिरवणुकात मानकरी व भक्तगण सहभागी होते. ठिकठिकाणी तसेच चौकाचौकात पालख्यांचे स्वागत होताना, पालखीत विराजमान देवांचेही मनोभावे दर्शन घेतले जात होते. दिवसभरात पावसाची उघडीप बघून महिला व युवतींनी कृष्णामाई देवीबरोबरच कृष्णा नदीची खणा- नारळाने ओटी भरत होत्या. दरवेळेप्रमाणे फुलांनी सजवलेल्या कमानी आणि सुवर्ण अलंकारांनी नटलेली, भरजरी साडीतील कृष्णामाई देवीचे दिव्य रूप पाहून भाविक भक्तिरसात चिंब झाले होते.
पावसाच्या सरींवर सरी कोसळत असताना, कृष्णामाईच्या यात्रा उत्सवाचा उत्साह मात्र, कायम राहीला. बालाजी चौकापासून लागलेल्या पूजेचे साहित्य, मेवा- मिठाई, सौंदर्य प्रसाधने अन् खेळणी आदींची विक्री दालने बालगोपाळ आणि महिला, युवतींनी गजबजलेली होती. अतिशय मंगलमय वातावरणात कराड नगरची ग्रामदैवत असलेल्या कृष्णामाई देवीची श्रावणी यात्रा सालाबादप्रमाणे उदंड उत्साहात भक्तिमय वातावरणात पार पडली.
