Dhananjay Munde : महाराष्ट्राच्या राजकारणातील एक महत्त्वाचं घराणं म्हणजे मुंडे घराणं. धनंजय मुंडे हे महायुती सरकारमध्ये मंत्री होते. मात्र त्यांना त्यांचं मंत्रिपद एका वादामुळे सोडावं लागलं. दरम्यान धनंजय मुंडे हे कायमच सोशल मीडियावर सक्रीय असतात. धनंजय मुंडेंची कन्या जान्हवी अमेरिकेत पत्रकार म्हणून काम करते आहे. धनंजय मुंडेंनी तिचं कौतुक करणारी एक पोस्ट लिहिली आहे. ज्या पोस्टची चर्चा रंगली आहे.
काय आहे धनंजय मुंडेंची पोस्ट?
माझी कन्या जान्हवीचा मनापासून अभिमान वाटतो! जान्हवी सध्या Wesleyan University, USA मध्ये Government आणि Literature या दोन विषयांमध्ये पदवी घेत आहे. मानवी हक्कांसाठी अभ्यास करणं हे तिचं खास क्षेत्र आहे. कॉलेजच्या वृत्तपत्रात ती आधी फोटो आणि विशेष लेख विभागाची प्रमुख होती, आता ती संपूर्ण वृत्तपत्राची मुख्य संपादक झाली आहे! CT Mirror या अमेरिकेतील प्रसिद्ध वृत्तसंस्थेत ती सध्या पत्रकार म्हणून काम करते आणि तिथे समाज, सरकार आणि लोकांच्या प्रश्नांवर ती संवेदनशीलपणे लिखाण करते. शिक्षणासोबतच ती सोशल मिडिया आणि जेलमध्ये शिक्षण देणाऱ्या संस्थेत संशोधन करत आहे. बाप म्हणून मला तिच्या मेहनतीचा, संवेदनशीलतेचा आणि प्रगतीचा खूप अभिमान वाटतो.
ती जे काही करतेय, ते केवळ यशासाठी नाही, तर समाजासाठी आहे आणि हेच तिचं खऱ्या अर्थानं मोठेपण आहे!
Proud of you Janhavi!
धनंजय मुंडेंना राजीनामा का द्यावा लागला?
मस्साजोगचे सरपंच संतोष देशमुख यांची डिसेंबर महिन्यात अत्यंत क्रूर पद्धतीने हत्या करण्यात आली. त्यांच्या हत्येचा मास्टरमाईंड हा वाल्मिक कराड आहे. वाल्मिक कराड हा धनंजय मुंडेंचा अत्यंत निकटवर्तीय मानला जातो. या प्रकरणी धनंजय मुंडेंवरही आरोप झाले होते. त्यामुळे त्यांना मंत्रिपद सोडावं लागलं होतं. दरम्यान धनंजय मुंडेंनी केलेली पोस्ट हे मुलीचं कौतुक करणारी पोस्ट आहे. त्यांच्या मुलीचं नाव जान्हवी असून ती अमेरिकेत शिकते आहे हे त्यांनीच या पोस्टमधून सांगितलं आहे. धनंजय मुंडे यांनी केलेली ही पोस्ट एक्स या समाजमाध्यमावर चर्चेचा विषय ठरली आहे.
ctmirror ला १५ वर्षे झाली आहेत. या वृत्तपत्राची एडिटर म्हणून जान्हवी धनंजय मुंडेची निवड झाली आहे. त्याबाबत आनंद व्यक्त करत जान्हवीबाबत धनंजय मुंडेंनी पोस्ट लिहिली आहे.
