पंढरपूर : संतश्रेष्ठ ज्ञानेश्वर महाराजांच्या पालखीचे ठाकूर बुवा समाधी येथे पार पडलेले नेत्रदीपक गोल रिंगण आणि पालखी सोहळा भेटीतून ज्ञानेश्वर माउली आणि सोपानदेव यांची बंधुभेट याने गुरुवारचा दिवस वारी आणि वारकऱ्यांसाठी संस्मरणीय ठरला. तर दुसरीकडे जगद्गुरू तुकाराम महाराज यांचा पालखी सोहळ्यात तोंडले बोंडले येथे धावा केला. दोन्ही संतांच्या पालख्यांचा आज पंढरपूर तालुक्यात प्रवेश झाला. त्यामुळे ‘भेटी लागे जीवा लागलीस आस’ या अभंगाप्रमाणे पायी वारीतील भाविकांना विठुरायाच्या दर्शनाची आस लागली आहे.
वेळापूर येथे मुक्कामी असलेली माउलींची पालखीने गुरुवारी सकाळी प्रस्थान ठेवले. हरीनामाचा जयघोष आणि टाळृमदंगांचा गजर यात तल्लीन झालेले वारकरी ठाकूर बुवा समाधी या ठिकाणी पोहोचली. या ठिकाणी माउलींचे रिंगण पाहण्यासाठी भाविक जमा झाले होते. काही वेळातच माउलींची पालखी त्या पाठोपाठ अश्व आले. चोपदाराने रिंगण लावले आणि अश्व धावू लागला आणि माउली माउली असा एकच गजर झाला. टाळ मृदंगांच्या आवाजात परिसर दणाणून गेला. अश्वाने तीन फेऱ्या पूर्ण केल्या आणि रिंगण सोहळा पार पडला.
पुढे पालखी तोंडले येथे दुपारचे भोजनासाठी विसावली. येथे दिंड्यांना थालीपीठ, दही, विविध प्रकारच्या चटण्या, उसळ, भाकरी, भात, लोणचे, अशा प्रकारची शिदोरी तोंडले-बोंडले परिसरासह तांदुळवाडी, शेंडेचिंच, माळखांबी, दसूर, खळवे आदी भागांतील गावकरी घेवून आले आणि या शिदोरीचा आस्वाद घेतला.
बंधुभेट सोहळा
पुढे पालाखी टप्पा येथे मार्गस्थ झाली. या ठिकाणी दोन भावंडांची भेट झाली. काही वेळातच माउलींचे बंधू सोपानदेव यांची पालखी आली. या दोन पालख्या एकमेकांना भेटल्या. या वेळी उपस्थित भाविकांनी विठ्ठल विठ्ठलचा जयघोष केला. माउलींच्या पालखी विश्वस्तांनी सोपानदेव यांच्या मानकरी यांना मानाचा नारळ दिला. बंधुभेटीचा भावपूर्ण सोहळा पाहून भाविक सुखावले. पुढे माउलींची पालखी भंडीशेगाव येथे मुक्कामी पोहोचली. तर दुसरीकडे जगद्गुरू तुकाराम महाराज यांच्या पालखीने बोरगाव येथून प्रस्थान ठेवले. पुढे पालखी मार्गस्थ होत तोंडले बोंडले या ठिकाणी पोहोचली. या ठिकाणी पालखीतील सर्व भाविक धावले.
तुका म्हणे धावा… आहे पंढरी विसावा… या अभंगाप्रमाणे भाविकांनी धावा केला आणि पालखी भंडीशेगाव येथे मुक्कामी पोहोचली. सर्व संतांच्या पालख्यांनी पंढरपूर तालुक्यात प्रवेश केला आहे. पालखी सोहळा पंढरपूरजवळ आल्याने भाविकांना आता पांडुरंगाच्या दर्शनाची आस लागली आहे.
पालख्या उद्या वाखरी मुक्कामी
माउलींची पालखी शुक्रवारी भंडीशेगाव येथून प्रस्थान ठेवून बाजीराव विहीर येथे चौथे गोल व उभे रिंगण होणार आहे. त्यानंतर पालखी वाखरी येथे विसावेल. तर जगद्गुरू तुकाराम महाराज यांची पालखी भंडीशेगाव येथून प्रस्थान ठेवून बाजीराव विहीर येथे उभे रिंगण होऊन पालखीचा मुक्काम वाखरी येथे होणार आहे.
