सावंतवाडी : कणकवली तालुक्यातील वारगाव-सोरफ सुतारवाडी येथे दारूच्या नशेत एका मुलाने आपल्या ८० वर्षीय आईची हत्या केल्याची धक्कादायक घटना घडली आहे. बुधवार, रात्री ११.३० च्या सुमारास घडलेल्या या घटनेत प्रभावती रामचंद्र सोरफ (८०) यांचा जागीच मृत्यू झाला. पोलिसांनी तात्काळ घटनास्थळी धाव घेत आरोपी मुलगा रवींद्र रामचंद्र सोरफ (४५) याला ताब्यात घेतले आहे. त्याच्यावर कणकवली पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, आरोपी रवींद्रला दारूचे व्यसन आहे. सोरफ कुटुंब ज्या घरात राहते, त्यात एकूण पाच कुटुंबे आहेत. बुधवारी रात्री रवींद्र आणि त्याची आई प्रभावती यांच्यात कोणत्यातरी कारणावरून वाद झाला. यातून संतप्त झालेल्या रवींद्रने कोयत्याने आईच्या डोक्यावर आणि शरीरावर अनेक ठिकाणी वार केले. रक्तबंबाळ झालेल्या आईला त्याने फरफटत घराच्या हॉलमध्ये आणले.
या घटनेमुळे संपूर्ण सोरफ कुटुंब हादरून गेले. घटनेची माहिती मिळताच कणकवली पोलीस घटनास्थळी दाखल झाले. तपासणीनंतर प्रभावती यांचा मृत्यू झाल्याचे निष्पन्न झाले, त्यांच्या शरीरावर कोयत्याचे गंभीर घाव होते. पोलिसांनी संशयित आरोपी रवींद्रला ताब्यात घेऊन कणकवली पोलीस ठाण्यात आणले.या घटनेमुळे कणकवली वारगाव परिसरात एकच खळबळ उडाली आहे.
