Eknath Khadse Son in law रेव्ह पार्टीतून रोहिणी खडसेंच्या पतीला म्हणजेच प्रांजल खेवलकर यांना अटक करण्यात आली आहे. प्रांजल हे राष्ट्रवादी काँग्रेसचे ज्येष्ठ नेते एकनाथ खडसेंचे जावई आहेत. या प्रकरणी आता राष्ट्रवादी काँग्रेसची पहिली प्रतिक्रिया समोर आली आहे. राष्ट्रवादी काँग्रेसच्या प्रवक्त्या विद्या चव्हाण यांनी या प्रकरणी प्रतिक्रिया दिली आहे.
नेमकं हे प्रकरण काय?
पुण्यातील खराडी भागातील उच्चभ्रू सोसायटीत सुरु असणाऱ्या रेव्ह पार्टीवर मारलेल्या पोलिसांच्या छापेमारीत रोहिणी खडसे यांचे पती प्रांजल खेवलकर यांना अटक करण्यात आली. हाऊस पार्टीच्या नावाखाली या रेव्ह पार्टीत अंमली पदार्थ, हुक्का, दारूचे सेवन सुरु होते. या सोसायटीतील छापेमारीत एकनाथ खडसेंचा जावई प्रांजल खेवलकरसह तीन महिला आणि दोन पुरुषांचाही सहभाग होता. यानंतर राष्ट्रवादी शरद पवार पक्षाकडून पहिली प्रतिक्रीया आली आहे.
विद्या चव्हाण नेमकं काय म्हणाल्या?
“मागील काही दिवसांपासून राष्ट्रवादी शरद पवार पक्षाच्या नेत्या रोहिणी खडसे आक्रमकपणे सरकारवर टीका करताना, विषय मांडताना दिसून येत आहेत. सरकारविरोधात सध्या कोणीही बोलताना दिसला तर त्याला त्रास देण्याऐवजी त्याच्या कुटुंबाला त्रास देण्याची नवी पद्धत सुरु झालीय. जे विरोधात बोलतात त्यांना थेट काही करता येत नाही त्यामुळं कुटुंबियांना टार्गेट केलं जात आहे.” असा आरोप विद्या चव्हाण यांनी केला. एबीपी माझाशी बोलत असताना त्यांनी हे विधान केलं.
मला या कारवाईमागे राजकीय अँगल दिसतो आहे-विद्या चव्हाण
जी घटना घडली त्याबाबत मला फारशी माहिती नाही. या प्रकरणातलं नेमकं सत्य काय आहे हे पोलीस तपासात समोर येईल. मला यात आता एक राजकीय अँगल असा दिसतोय की कोणीही आता सत्ताधाऱ्यांविषयी बोललं की त्यांना नाही पण त्यांच्या कुटुंबीयांना त्रास देण्याची जी पद्धत सुरु झाली आहे, मला हा सगळा त्यातलाच प्रकार वाटतो आहे. त्यामुळे जे काही चाललंय, जे गुन्हे चालले आहेत,जे हुंडा बळी सुरु आहेत.यावर कुठलीही कारवाई होताना दिसत नाह. पण जे विरोधात बोलत आहेत त्यांच्या कुटुंबाला त्रास दिला जातोय. रोहिणी ताई खडसे सरकारच्या विरोधात बोलत आहेत त्यामुळे त्यांचं तोंड कसं बंद करा, त्यांच्या नवऱ्याला पकडता येईल का? असं करुन टार्गेट केलं जातं आहे असंही विद्या चव्हाण म्हणाल्या.
रोहिणी खडसेंनी सध्या बोलण्यास दिला नकार
एकनाथ खडसेंचा जावई प्रांजल खेवलकरला फ्लॅटमधे पार्टी करताना पोलिसांकडून अटक करण्यात आली आहे. पुण्यातील खराडी भागातील एका सोसायटीतील फ्लॅटमधे पार्टी सुरु होती. प्रांजल खेवलकरसह त्याचा एक मित्र आणि तीन महिला पार्टीत सहभागी झाल्या होत्या. या पार्टीत दारु, हुक्का आणि काही प्रमाणात अंमली पदार्थांचे सेवन होत असल्याचा पोलिसांचा दावा आहे. प्रांजल खेवलकरसह ताब्यात घेतलेल्या इतरांना पोलीसांनी वैद्यकीय चाचणीसाठी ससून रूग्णालयामध्ये नेण्यात आलं आहे. रोहिणी खडसे सध्या या प्रकरणाची माहिती घेत आहेत. त्यामुळे सध्या बोलायला नकार दिला आहे.
