लोकसत्ता प्रतिनिधी सांगली : कपडे धुण्यासाठी कृष्णा नदीत उतरलेले पाच परप्रांतीय कामगार बुडाल्याची घटना गुरूवारी मिरजेतील कृष्णा घाट येथे घडली. यापैकी तिघांना वाचविण्यात यश आले असून एकाचा मृत्यू झाला तर एकजण अद्याप बेपत्ता आहे. मिरज-मालगाव रस्त्यावरील दत्तनगर येथे भाड्याने वास्तव्यास असलेले राजस्थानमधील फरशी बसविण्याचे काम करणारे सहा कामगार कपडे धुण्यासाठी कृष्णा घाटावर गेले होते. यापैकी पाच जण पाण्यात उतरले होते. कपडे धूत असताना यापैकी पाच जण पाण्यात बुडाले. बुडालेल्यापैकी तिघांना वाचविण्यात ओम पाटील या तरूणाला यश आले. मात्र, रामस्वरूप यादव (वय २३) आणि जितेंद्र यादव (वय २१) हे दोघे वाहत्या पाण्यात बेपत्ता झाले. आणखी वाचा-अनाथ मतिमंद मुलीवर लैंगिक अत्याचार करणाऱ्या शिक्षकाला २० वर्षे सक्तमजुरी सदरची घटना समजताच महापालिकेचे अग्निशमन दल, आयुष सेवा भावी संस्था व वजीर बचाव पथक घटनास्थळी दाखल झाले. शोध पथकाला रामस्वरूप यादव याचा मृतदेह हाती लागला असून दुसरा बेपत्ता झालेला जितेंद्र यादव मात्र अद्याप हाती लागलेला नाही.
