लोकसत्ता प्रतिनिधी अकोला : वाशीम जिल्ह्यात करोनाबाधित आणखी पाच रुग्ण आढळून आले आहेत. त्यामुळे जिल्ह्यातील एकूण रुग्ण संख्या २६ झाली. सध्या १८ रुग्णांवर उपचार सुरू आहेत. वाशिम तालुक्यातील बोराळा हिस्से येथील एका ५६ वर्षीय रुग्णाचा करोना चाचणी अहवाल आज सकारात्मक आला आहे. बोराळा हिस्से येथील करोनाबाधित युवकाच्या संपर्कात आल्याने त्यांना लागण झाली. दिल्ली येथून कारंजा लाड तालुक्यातील सुकळी येथे आलेल्या व ‘आयएलआय’ लक्षणे असलेल्या एकाच कुटुंबातील ३२ वर्षीय पुरुष, २४ वर्षीय महिला व दोन वर्षीय बालिकेचा करोना तपासणी अहवाल सकारात्मक आला आहे. कारंजा लाड येथील एका ५३ वर्षीय व्यक्तीला सुद्धा करोना विषाणूचा संसर्ग झाल्याचे निष्पन्न झाले आहे. या रुग्णाला करोना संसर्गाची लक्षणे असल्याने खासगी रुग्णालयातून पाठविण्यात आले.
