रत्नागिरी : लांजा येथील मुथूट फायनान्स लिमिटेडच्या शाखेत २६ लाख ८१ हजार रुपयांची फसवणूक झाल्याची घटना उघडकीस आली आहे. याप्रकरणी शाखा व्यवस्थापकासह एकूण पाच कर्मचा-यांवर लांजा पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, हा प्रकार २४ जून २०२४ ते ५ मे २०२५ दरम्यान घडला आहे. या प्रकरणी संजय चुडाजी राऊळ (वय ४४) यांनी पोलीस ठाण्यात फिर्याद दाखल केली आहे. फिर्यादी हे कंपनीचे क्लस्टर मॅनेजर आहेत. तर इतर सर्व पाचजण संशयित हे लांजा शाखेचे कर्मचारी आहेत. यामध्ये संशयितांमध्ये सुनील तुकाराम गुरव (वय ५४, शाखा व्यवस्थापक), प्रसाद सीताराम रामाणे (वय २८, ज्युनिअर रिलेशन एक्झिक्युटिव्ह), सुशांत सुनील धाडवे (वय २७, रोखपाल आणि ज्युनिअर रिलेशन एक्झिक्युटिव्ह), ओंकार दिवाकर थारळी (वय २६, ज्युनिअर रिलेशन एक्झिक्युटिव्ह), आणि तुषार गजानन वाडेकर (वय २७, ज्युनिअर रिलेशन एक्झिक्युटिव्ह)इत्यादीचा समावेश आहे.
या सर्व आरोपींनी संगनमताने बँकेच्या खातेदारांनी तारण ठेवलेल्या सोन्याच्या दागिन्यांमध्ये फेरफार केला आहे. तसेच सोने बदलून एकूण २७३.७ ग्रॅम सोन्याचा अपहार केला. ज्याची किंमत २३ लाख ९६ हजार रुपये आहे. याशिवाय, त्यांनी कंपनीची परवानगी न घेता साक्षीदार कांता कमलाकर कुरुप यांना त्यांच्या सोन्याच्या दागिन्यांच्या बदल्यात २लाख ८५ हजार रुपये दिले. या सर्व गैरव्यवहारामुळे कंपनीची एकूण २६ लाख ८१ हजार रुपयांची फसवणूक झाली. या गुन्ह्याखाली भारतीय न्यायसंहिता अधिनियम २०२३ च्या कलम ४१६ (१), ४१८(४), आणि ४२१(१) नुसार गुन्हा दाखल करण्यात आला आहे.
