केरळ राज्यातील एका बँकेचे तीन कोटी रुपये किमतीचे साडेसात किलो सोने चोरल्याच्या गुन्ह्यात शुक्रवारी रात्री केरळ आणि सातारा पोलिसांनी संयुक्त कारवाई करत चार जणांना साताऱ्यातून ताब्यात घेतले. ताब्यात घेतलेल्या संशयितांना केरळ येथे नेण्यात आले आहे. निखिल जोशी( नाशिक)सचिन शेलार, नवनाथ पाटील, अतुल धनवे अशी संशयितांची नावे आहेत. यातील जोशी केरळ चोरीचा मुख्यसूत्रधार असल्याचे पोलीस सूत्रांनी सांगितले.
केरळ पोलिसांत एका बँकेचे तीन कोटी रुपये किमतीचे सोने चोरीस गेल्याचा गुन्हा दाखल झाला आहे. या गुन्ह्याचा केरळ पोलिस महाराष्ट्रात तपासात करत होते. तांत्रिक तपासात नाशिक येथील निक उर्फ निखिल जोशी या युवकाचा या गुन्ह्यात समावेश असून तोच मुख्यसूत्रधार असल्याचे समोर आले. त्यानुसार केरळ पोलिसांनी नाशिकवर लक्ष केंद्रीत केले. संशयित जोशी हा वारंवार जागा बदलत होता त्यामुळे त्याला पकडणे अवघड होत होते. मागील काही दिवस नाशिकचा जोशी सातारा परिसरात असल्याची माहिती केरळ पोलिसांना मिळाली होती. त्या अनुषंगाने केरळ पोलिसांचे एक पथक शुक्रवारी सकाळी सातारा येथे दाखल झाले. त्यांनी पोलिस अधीक्षक अजयकुमार बन्सल यांची भेट घेऊन गुन्ह्याची माहिती देत संशयित सातारा परिसरात असल्याचे सांगितले. यानुसार बन्सल यांनी स्थानिक गुन्हे शाखेचे पोलीस निरीक्षक किशोर धुमाळ यांना केरळ पोलिसांना मदत करण्याचा सूचना केल्या. यानुसार स्थानिक गुन्हे शाखेचे मुनीर मुल्ला, मंगेश मोहिते, शिवाजी भिसे, वैभव सावंत यांना केरळ पोलिसांच्या मदतीला देण्यात आले. शोध घेताना संशयित साताऱ्यात महामार्गावरील एका हॉटेलमध्ये आपल्या तीन साथीदारांसह असल्याची माहिती मिळाली. यानुसार पोलिसांनी हॉटेलवर छापा टाकत नाशिक येथील मुख्य संशयित निखिल जोशी व त्याच्या सातारा व कोरेगावातील तीन पैलवान सचिन शेलार,नवनाथ पाटील अतुल धनवे या मित्रांना पोलिसांनी ताब्यात घेतले.
चिपळूण महापूर : पाटबंधारे, हवामान व महसूल विभागाविरोधात नगरपालिका न्यायालयात जाणार!
साताऱ्यात प्राथमिक चौकशी करून त्या चौघांना केरळ पोलिसांच्या ताब्यात देण्यात आले. केरळ पोलीस त्यांना घेऊन गेले. ताब्यात घेतलेल्या नाशिकमधील जोशी गुन्ह्यातील मुख्यसूत्रधार असला, तरी साताऱ्यातील युवकांचा त्यात सहभाग आहे हे तपासानंतर समोर येणार आहे. पोलिसांनी एक महागडी मोटार देखील याप्रकरणात जप्त केली असल्याचे पोलीस सूत्रांनी सांगितले.
