ठाणे, कल्याणात भाजप, शिंदेसेनेतील संघर्ष टिपेला

दिपेश यांचा भाजप प्रवेश नक्की होत असताना एकनाथ शिंदे यांनी कल्याण पुर्वेत भाजपचे कडवे विरोधक महेश गायकवाड यांना मुंबईतील निवासस्थानी बोलावून घेत त्यांच्याकडे पक्षाच्या विधानसभा अध्यक्षपदाची जबाबदारी सोपवली. महापालिका निवडणुकांपुर्वी या दोन्ही पक्षांमध्ये स्थानिक पातळीवर जोरदार कुरघोडी सुरु झाली असून ठाकरे, पवार आणि स्व:पक्षातील नेतेही एकमेकांच्या गळाला लागणार नाहीत यासाठी जोरदार मोर्चेबांधणी केली जात आहे.

एकनाथ शिंदे यांनी शिवसेनेत बंड करताच डोंबिवलीचे दिपेश म्हात्रे हेदेखील त्यांच्यासोबत राहीले. कल्याणचे खासदार डाॅ.श्रीकांत शिंदे यांचे निकटवर्तीय म्हणून दिपेश ओळखले जात. दिपेश यांचे वडील पुंडलिक म्हात्रे हे कल्याण डोंबिवली महापालिकेचे माजी महापौर आहेत. त्यांच्याकडून राजकीय वारसा मिळालेल्या दिपेश यांना विधानसभा निवडणुक लढविण्याची इच्छा होती. मात्र डोंबिवली विधानसभा मतदारसंघ रविंद्र चव्हाण यांच्याकडे असल्याने महायुतीच्या गणितात दिपेश यांना उमेदवारी मिळणे कठीण बनले. त्यामुळे निवडणुकांच्या हंगामात दिपेश पुन्हा उद्धव ठाकरे यांच्याकडे परतले.

डाॅ. श्रीकांत शिंदे यांचे आदेश एरवी शिरसावंद्य मानणारे दिपेश अचानक उद्धव गटाकडे परतल्याने भाजपमध्येही अस्वस्थता होती. दिपेश यांचा कर्ताकरवीता कोण अशी चर्चाही तेव्हा रंगली होती. विधानसभा निवडणुकीतील पराभवानंतरही उद्धव यांनी दिपेश यांच्याकडे पक्षाचे जिल्हाप्रमुख पद सोपविले होते. मात्र सत्तेबाहेर रहाण्याची सवय नसलेले दिपेश यांनी जेमतेम वर्षभरातच मातोश्रीला जय महाराष्ट्र केला आहे. विशेष म्हणजे, दिपेश यांचा कल शिंदेसेनेच्या दिशेने असेल अशी चर्चा असतानाच भाजपचे प्रदेशाध्यक्ष आणि स्थानिक आमदार रविंद्र चव्हाण यांनी त्यांना भाजपकडे वळवून आगामी महापालिका निवडणुकांमध्ये एकनाथ शिंदे यांच्यापुढेच आव्हान उभे केल्याचे दिसते. या निवडणुकीत युती झालीच तरी निवडणुकपुर्व वाटाघाटींमध्ये भाजप उजवा ठरावा अशापद्धतीची ही रणनिती असून शिंदेसेनेसोबत दोन हात करावे लागलेच तर दिपेश यांचा पुरेपूर वापर करता येईल अशी आाखणी चव्हाण यांनी यानिमीत्ताने केली आहे.

महेश गायकवाड यांना शिंदेनी चुचकारले

कल्याण पुर्व विधानसभा मतदारसंघातील शिंदेसेनेचे पदाधिकारी महेश गायकवाड हे कडवे भाजप विरोधक मानले जातात. या भागातील भाजपचे माजी आमदार गणपत गायकवाड यांनी पोलीस ठाण्यातच महेश यांच्यावर केलेल्या गोळीबाराचे प्रकरण गाजले होते. गायकवाड यांच्या पत्नी आणि विद्यमान आमदार सुलभा यांच्याविरोधात महेश यांनी अपक्ष म्हणून निवडणूक लढविली होती. त्यावेळी खासदार शिंदे यांचे बहुसंख्य समर्थक महेश यांच्याबरोबर होते. दिपेश यांचा भाजप प्रवेश नक्की होत असताना शिंदे यांनी शुक्रवारी रात्री उशीरा महेश यांना मुंबईत बोलावून घेतले आणि त्यांना पक्षाचे विधानसभा अध्यक्षपद देऊ केले. कल्याण डोंबिवली महापालिका हद्दीत उद्धव ठाकरे आणि शरद पवार यांच्या पक्षाची अवस्था तोळामासा असताना याठिकाणी भाजप आणि शिंदेसेनेत कुरघोडीच्या राजकारणाने टोक गाठल्याचे चित्र यानिमीत्ताने पुढे आले आहे. विशेष म्हणजे ठाकरे, पवारांच्या पक्षासह एकमेकांच्या पक्षाच्या प्रभावी नेत्यांवरही भाजप, शिंदेसेनेचे नेते गळ टाकू लागल्याचे चित्र आता दिसू लागले आहे.