Sindhudurg Ganeshotsav 2025 update : सिंधुदुर्ग जिल्ह्यात गणेशोत्सवाचा उत्साह सध्या शिगेला पोहोचला आहे. जिल्ह्यातील सर्व लहान-थोर नागरिक गौरी-गणपती सणाच्या तयारीमध्ये पूर्णपणे मग्न आहेत. या वर्षी सिंधुदुर्ग जिल्ह्यात तब्बल ७२,७५५ घरगुती आणि ३२ सार्वजनिक गणेशोत्सव मंडळे बाप्पाची प्रतिष्ठापना करणार आहेत. बुधवार, २७ ऑगस्ट रोजी श्री गणेश मूर्तींची स्थापना होणार असल्याने, सध्या मूर्तिकारांच्या कार्यशाळांमध्ये आणि बाजारपेठांमध्ये भक्तांची प्रचंड लगबग सुरू आहे.
गणेशोत्सवाच्या स्वागतासाठी घरोघरी जोरदार तयारी करण्यात आली आहे. अनेकांनी आपल्या घरांची रंगरंगोटी केली असून, विद्युत रोषणाईने घरे उजळून निघाली आहेत. गणपती बाप्पाची मूर्ती स्थापन करण्यासाठी माठ सजवण्यासाठी रानफुले आणि रानफळे गोळा करण्याची लगबग सुरू आहे. सिंधुदुर्ग जिल्ह्याचे वैशिष्ट्य म्हणजे येथील भाविक बहुतांश वेळा मातीच्या गणेश मूर्तींची पूजा करतात. अनेक घरांमध्ये दीड, पाच, सात, नऊ, किंवा अकरा दिवसांसाठी गणपती बाप्पा विराजमान होतात आणि भक्त मोठ्या श्रद्धेने त्यांची पूजा करतात. वाढत्या महागाईचा परिणाम श्रींच्या पूजेवर अजिबात झालेला नाही, कारण हा सण साजरा करताना प्रत्येक घरात आनंदी आणि उत्साही वातावरण पाहायला मिळते.
विघ्नहर्ता श्री गणेशाचे आगमन आणि विसर्जन जिल्ह्यात भजन आणि इतर धार्मिक कार्यक्रमांनी मोठ्या उत्साहात साजरे केले जाते. श्रींची मूर्ती आणताना आणि विसर्जन करताना मोठ्या मिरवणुका काढल्या जातात. मूर्तिकारांच्या कार्यशाळांमधून गणपतीची मूर्ती आपल्या घरी घेऊन जाण्यासाठी भाविकांची गर्दी झाली आहे. गेल्या काही दिवसांपासून पावसाने उघडीप दिल्याने, भक्तांना खरेदीसाठी आणि मूर्ती आणण्यासाठी सोयीचे झाले आहे, ज्यामुळे त्यांचा उत्साह आणखी वाढला आहे.
