शहराला पुन्हा वादळाचा तडाखा

शहराला आज, गुरुवारी सायंकाळी पुन्हा जोरदार वादळाने तडाखा दिला. काही ठिकाणी घरांवरील पत्रे उडून गेले, मात्र कोणतीही मोठी हानी झालेली नाही. सुमारे तासभर सुरू असलेल्या वादळी वा-याने शहरात चांगलीच घबराट उडवून दिली.

शहराला आज, गुरुवारी सायंकाळी पुन्हा जोरदार वादळाने तडाखा दिला. काही ठिकाणी घरांवरील पत्रे उडून गेले, मात्र कोणतीही मोठी हानी झालेली नाही. सुमारे तासभर सुरू असलेल्या वादळी वा-याने शहरात चांगलीच घबराट उडवून दिली. एमआयडीसी ते सावेडी या पट्टय़ात पाऊसही झाला.
दिवसभर नगरकर उकाडय़ाने हैराण होते. वीजकपातीने त्यात भरच टाकली आहे. सायंकाळी सहानंतर दाटलेल्या ढगांनी अंधाराचे वातावरण निर्माण केले. जोरदार पावसाची अपेक्षा होती. काही वेळातच प्रचंड वेगाने वाहणा-या वा-याचा तडाखा शहराला बसला. सुमारे तासभर वारे वाहात होते. शहरात काही ठिकाणी घरावरील, शेडवरील पत्रे उडाली. घराच्या खिडक्या, दारेही वा-याने जोरदार आपटत होती. धुळीचे लोटही वाहात होते, त्यामुळे चालकांना वाहने चालवणे अवघड झाले होते.
एमआयडीसी ते सावेडी दरम्यान सायंकाळी पावसास सुरुवात झाली होती, मात्र त्याच वेळी मध्यवर्ती भाग ते केडगाव उपनगर दरम्यान पाऊस नव्हता. जोरदार वा-याने शहराच्या अनेक भागातील वीजपुरवठा खंडित झाला होता. तासाभरानंतर वा-याचा वेग मंदावला.
तत्पूर्वी दुपारी प्रचंड उकाडा होता. गेल्या काही दिवसांपासून शहर व परिसरात उकाडा कमालीचा वाढला आहे. बुधवारी सायंकाळी सलग दुस-या दिवशी मान्सूनपूर्व पावसाने हजेरी लावली. सायंकाळी आठच्या सुमारास मोठय़ा पावसाला सुरुवात झाली. तो सुमारे अर्धा तास कोसळत होता. त्यानंतरही रात्री उशिरापर्यंत भुरभुर सुरूच होती. मंगळवारीही शहरात मान्सूनपूर्व पाऊस झाला होता.  

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व महाराष्ट्र बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Heavy rain with storm in city