सावंतवाडी : सिंधुदुर्ग जिल्ह्यात भारतीय जनता पक्ष (भाजप) आणि शिवसेना (शिंदे गट) यांच्यातील अंतर्गत वाद चव्हाट्यावर आला आहे. भाजप जिल्हाध्यक्ष प्रभाकर सावंत यांनी मुख्यमंत्री देवेंद्र फडणवीस यांच्याकडे शिवसेना जिल्हाप्रमुख दत्ता सामंत (मालवण-कुडाळ) आणि संजू परब (सावंतवाडी) यांच्या विरोधात थेट तक्रार केली आहे.
सावंत यांच्या मते, महायुतीचा धर्म पाळून भाजपने शिवसेनेच्या विधानसभा उमेदवारांच्या विजयासाठी अथक प्रयत्न केले, मात्र निवडून आल्यानंतर शिवसेनेचे पदाधिकारी भाजप कार्यकर्त्यांना वैयक्तिक प्रलोभने आणि कामांची आश्वासने देऊन पक्षात सामील करून घेण्याचा प्रयत्न करत आहेत. यामुळे स्थानिक पातळीवर दोन्ही पक्षांमध्ये संघर्ष वाढत असल्याचे सावंत यांनी म्हटले आहे.
या आरोपांवर शिवसेना जिल्हाप्रमुख संजू परब यांनी पलटवार करत भाजप जिल्हाध्यक्ष प्रभाकर सावंत यांच्यावर आमदार दीपक केसरकर आणि आमदार निलेश राणे यांच्याबद्दल गैरसमज पसरवल्याचा आरोप केला आहे. परब यांच्या मते, यामागे ‘बोलवता धनी’ (पडद्यामागचा सूत्रधार) वेगळाच असून, मंत्रीपद मिळण्याच्या भीतीपोटी हे सर्व सुरू आहे. खासदार नारायण राणे यांच्याकडे तक्रार न करता थेट मुख्यमंत्र्यांकडे जाण्यामागे आमदार दीपक केसरकर आणि आमदार निलेश राणे यांना मंत्रीपद मिळू नये हाच उद्देश असल्याचा संजू परब यांचा दावा आहे.
परब यांनी स्पष्ट केले की, आमदार दीपक केसरकर यांनी त्यांना भाजप कार्यकर्त्यांना पक्षात प्रवेश न देण्यास सांगितले होते आणि त्यानुसार ते कोणालाही प्रवेश देत नाहीत. भाजप कार्यकर्त्यांना सांभाळण्याची जबाबदारी त्यांच्याच जिल्हाध्यक्षांची असून, कार्यकर्ते इतके लवचिक आहेत का, असा टोलाही परब यांनी लगावला. आगामी स्थानिक स्वराज्य संस्थांच्या निवडणुकांमध्ये महायुतीचे नेते म्हणून खासदार नारायण राणे यांचाच निर्णय अंतिम असेल असेही परब यांनी नमूद केले. या वादामागे मंत्रीपदाचे राजकारण आणि भाजपच्या कार्यकर्त्यांना आकर्षित करण्याचा प्रयत्न असल्याचे स्पष्ट करण्यात आले.
