सावंतवाडी: सिंधुदुर्ग आणि कोल्हापूर जिल्ह्यांना जोडणारा महत्त्वाचा मार्ग, करुळ-गगनबावडा घाट, तब्बल नऊ दिवसांनंतर पुन्हा वाहतुकीसाठी खुला करण्यात आला आहे. सिंधुदुर्गच्या जिल्हाधिकारी तथा जिल्हा दंडाधिकारी तृप्ती घोडमिसे यांनी याबाबतची अधिसूचना जारी केली आहे. हा मार्ग उद्या, १३ सप्टेंबर रोजी सर्व प्रकारच्या वाहनांसाठी सुरू होत आहे.
यापूर्वी, ४ सप्टेंबर रोजी सकाळी ८ वाजताच्या सुमारास गगनबावडा घाटातील राष्ट्रीय महामार्ग के १६६ जी वर दरड कोसळली होती. यामुळे संपूर्ण रस्ता माती आणि दगडांनी भरला होता, ज्यामुळे वाहतूक पूर्णपणे थांबली होती. या घटनेनंतर, भविष्यात असे अपघात टाळण्यासाठी करूळ गगनबावडा घाटात सैल झालेल्या खडकांचे सैलकरण करणे आवश्यक होते. यासाठी तज्ज्ञ अभियंत्यांच्या पथकाने युद्धपातळीवर काम केले.
रत्नागिरीच्या राष्ट्रीय महामार्ग विभागाने दरड हटवण्याचे आणि धोकादायक ठिकाणी आवश्यक उपाययोजना करण्याचे काम पूर्ण केले आहे. यामुळे हा घाट पुन्हा एकदा वाहतुकीसाठी सुरक्षित झाला आहे. जिल्हा दंडाधिकारी तृप्ती घोडमिसे यांनी दिलेल्या आदेशानुसार, तळेरे-गगनबावडा-कोल्हापूर महामार्ग आता वाहतुकीसाठी खुला झाला आहे, ज्यामुळे दोन्ही जिल्ह्यांचे दळणवळण पुन्हा सुरळीत होईल. सिंधुदुर्ग आणि कोल्हापूर जिल्ह्यांना जोडणारा दुवा असलेला करूळ गगनबावडा घाट सुरळीत चालू राहण्यासाठी बांधकाम विभागाने काही कोसळण्याच्या स्थितीत असलेल्या दरडी हटविल्या असल्याचे म्हटले आहे.
