Maharashtra Breaking News Live : दिल्लीत झालेला कारचा स्फोट हे केंद्र सरकारचं अपयश, नाना पटोलेंची टीका आणि इतर महत्त्वाच्या घडामोडी

दिल्लीमध्ये झालेल्या स्फोटानंतर देशभरात अलर्ट जारी करण्यात आले आहेत. त्यामुळे राज्यातील गर्दीच्या ठिकाण असलेल्या अनेक देवस्थानांच्या सुरक्षेत वाढ करण्यात आली आहे. बुलढाणा जिल्ह्यातील विदर्भाची पंढरी म्हणून ओळख असलेल्या गजानन महाराजांच्या शेगाव मंदिर परिसरातही सुरक्षा वाढवण्यात आली आहे. रात्रीपासूनच कुठलाच गैरप्रकार घडू नये यासाठी पोलीस यंत्रणेसह शेगाव मंदिर सुरक्षा रक्षक अलर्ट मोडवर आले आहेत. प्रत्येक येणाऱ्या भाविकांची या ठिकाणी कसून चौकशी केली जात आहे. त्यांच्या बॅगा तपासल्या जात आहेत. त्या अनुषंगाने सुरक्षा यंत्रणा खबरदारी घेत असल्याचे पाहायला मिळत आहे.

आम्हीच करू शकतो अशा पद्धतीने आश्वासन देऊन लोकांना मूर्ख बनवलं. आता कश्मीर असुरक्षित आहे, छप्पन इंचाची छाती आता कुठे गेली आहे? आम्हाला राजकारण करायचं नाही. दिल्लीत आणि केंद्रात सरकार यांच असताना हे दहशतवादी या ठिकाणी आले कुठून? असा प्रश्न निर्माण होत आहे.नरेंद्र मोदींनी दिलेल्या खोटे आश्वासनांची पोलखोल आता झाली आहेभ्याड हल्ल्याचा आम्ही निषेध करतो. अशी टीका नाना पटोले यांनी केली आहे. आम्हाला यात राजकारण करायचं नाही पण देशाच्या सुरक्षेचा हा प्रश्न आहे. मुंबईच्या दहशतवादी हल्ल्यात आम्ही तिथेच दहशतवाद्यांना कंठस्नान घातलं. या बॉम्बस्फोटामध्ये दहशतवादी येतात, सरकार बिहारच्या प्रचारात मग्न आहेत. या प्रश्नांची उत्तरं द्यावी लागणार आहे. देश सुरक्षित नाही, देशाच्या सुरक्षेची हमी घेणारे प्रधानमंत्री, गृहमंत्री कुठे लपले आहेत? या स्फोटाची जबाबदारी त्यांची आहे अशी टीकाही नाना पटोलेंनी केली आहे.