गृह मंत्रालयाच्या ढिसाळपणावर प्रश्नचिन्ह उपस्थित करत खासदार सुप्रिया सुळे यांचा बीड दौरा

फलटण येथील महिला डॉक्टर आत्महत्येप्रकरणी सोमवारी राष्ट्रवादी काँग्रेस शरद पवार गटाच्या खासदार सुप्रिया सुळे यांनी कुटुंबीयांची भेट घेतली. डॉक्टर आत्महत्या प्रकरण हे अस्वस्थ करणारे असून, ही आत्महत्या आहे की हत्या आहे हे सगळ्या महाराष्ट्राला समजले पाहिजे. या कुटुंबाला न्याय मिळाला पाहिजे, असे त्या म्हणाल्या. या प्रकरणाकडे सरकारने माणुसकीने बघितले पाहिजे. याप्रकरणी असंवेदनशील आणि गलिच्छ वक्तव्ये केली जात आहेत आणि हे अस्वस्थ करणारे आहे. या प्रकरणात जे विशेष तपास पथक नियुक्त करण्यात आले आहे ते पूर्ण नाही असे कुटुंबाचे म्हणणे असून, आम्ही मुख्यमंत्री देवेंद्र फडणवीस आणि उपमुख्यमंत्री आणि बीडचे पालकमंत्री अजित पवार यांच्या कानावर हा विषय घातला आहे. न्यायाधीशांच्या नेतृत्वाखाली चौकशी केली जावी, यात कसलेही राजकारण होऊ नये, असे त्या म्हणाल्या.

महाराष्ट्राने आपल्या लेकीच्या बाबतीत संवेदनशील असावे, असे म्हणत महिला आयोगाच्या अध्यक्षाच्या वक्तव्यावर आम्ही नाराजी व्यक्त केली असून, त्यांच्याबाबत काय निर्णय घ्यायचा तो त्यांच्या पक्षाचा आणि सरकारचा भाग असल्याचेही सुळे म्हणाल्या. त्यांनी परळीचे व्यापारी महादेव मुंडे यांची पत्नी ज्ञानेश्वरी यांचीही भेट घेतली. या खुनाचा तपास करणाऱ्या विशेष तपास पथकाचे प्रमुख पंकज कुमावत यांच्याशीही त्यांनी दूरध्वनीवरून चर्चा केली. जो तपास केला आहे, त्याची माहिती कुटुंबीयासही देण्यात यावी, असा सल्ला त्यांनी पोलिसांना दिला. गृह मंत्रालयाच्या ढिसाळ कारभारावर प्रश्नचिन्ह उपस्थित करत खासदार सुळे यांनी बीड जिल्ह्याचा दौरा केला.