सोलापूर : ट्रिपलसीट चालविताना पकडण्यात आलेली दुचाकी सोडण्यासाठी लाच घेताना सोलापूर शहरात वाहतूक शाखेच्या फौजथराला लाचलुचपत प्रतिबंधक विभागाच्या पथकाने पकडले. त्याच्या विरूध्द जेलरोड पोलीस ठाण्यात गुन्हा दाखल झाला आहे. श्रीकांत बलभीम जाधव असे कारवाई झालेल्या फौजदाराचे नाव आहे. यातील तक्रारदाराच्या भावाला जोडबसवण्णा चौकात दुचाकी ट्रिपलसीट चालविता शहर वाहतूक शाखेच्या उत्तर विभागातील फौजदार श्रीकांत जाधव यांनी पकडले होते. त्यांची दुचाकी वाहतूक शाखेत आणून जमा करण्यात आली होती. यातील तक्रारदार दुचाकी सोडविण्यासाठी वाहतूक शाखेत फौजदार जाधव यांना भेटले असता त्यांनी २७०० रूपयांची मागणी करून सातशे रूपये दंडाची आँनलाईन पावती दिली. उर्वरीत दोन हजार रूपयांची लाच स्वीकारली. त्यावेळी लाचलुचपत प्रतिबंधक विभागाच्या पथकाने त्यांना जागेवरच ताब्यात घेतले. सहायक पोलीस आयुक्त गणेश कुंभार व पोलीस निरीक्षक उमाकांत महाडिक यांच्या पथकाने ही कारवाई केली.
