पुणतांबे आता राजकीय पर्यटन केंद्र !

शिवसेनेचे कार्याध्यक्ष उद्धव ठाकरे यांनी पुणतांबे गावाला भेट देऊन कर्जमाफीचे श्रेय पुणतांबे येथील शेतकऱ्यांना दिले. विशेष म्हणजे या वेळी झालेल्या मेळाव्यात संपाची संकल्पना मांडणारे धनंजय धोर्डे यांना सत्कारातून डावलण्यात आले होते. मात्र, धनंजय जाधव, डॉ. धनंजय धनवटे, बाळासाहेब चव्हाण, सुहास वहाडणे यांचा सत्कार करण्यात आला. धोर्डे यांना डावलल्याने लोकांनी घोषणाबाजी केली. त्यामुळे त्यांचा सत्कार करत ठाकरे यांनी त्यांना व्यासपीठावर शेजारी बसविले. जाधव व धनवटे यांच्यावर संप फोडल्याचा आरोप झाला होता. तेदेखील सत्काराच्या वेळी आघाडीवर होते. राजकीय भूमिका वेगळ्या असल्या तरी त्यांना भाषणाची संधी देण्यात आली नव्हती. सेनानेत्यांनी केवळ वहाडणे यांना ते सेनेचे असल्याने संधी दिली होती. पण चव्हाण यांनी ध्वनिक्षेपक हातात घेऊन भाषण केले.

संपाची कल्पना मांडणारे धोर्डे हे पुणतांबा गावाच्या नदीपलीकडे वैजापूर (जि. औरंगाबाद) तालुक्यातील डोणगाव येथील आहे. त्यांना सुरुवातीपासून दूर ठेवण्याचा प्रयत्न झाला होता. धोर्डे यांना संपाच्या काळात ठोस भूमिका घेता आली नव्हती. संप सुरू करण्यापूर्वी त्यांनी मुख्यमंत्री फडणवीस यांची भेट घेतली होती. ठाकरे यांच्या दौऱ्यानंतर पुन्हा त्यांनी वैजापूर तालुक्यातील कार्यकर्त्यांसह मुख्यमंत्र्यांची भेट घेतली. त्यांच्या भेटीला काहींचा आक्षेप आहे. आपल्या संकल्पनेमुळे संप घडला. कर्जमाफी झाली. आता काहीही राजकारण होवो त्यात आपल्याला स्वारस्य नाही असे त्यांनी सांगितले.

पहिल्यांदा विरोधी पक्षनेते राधाकृष्ण विखे-पाटील यांच्या मदतीने संप फोडल्याचे खापर डॉ. धनवटे यांच्यावर तर नंतर आमदार स्नेहलता कोल्हे यांच्या मदतीने संप फोडल्याचे खापर जाधव यांच्यावर फोडण्यात आले. त्यांचा सत्कार करण्यात आला. संपानंतर ते एकाच व्यासपीठावर होते हे विशेष. संप फोडण्यात मुख्य भूमिका असल्याचा संदीप गिड्डे व जयाजी सूर्यवंशी या किसानक्रांतीच्या संयोजकांवर आरोप केला जातो. सूर्यवंशी हे गरहजर असले तरी गिड्डे मात्र व्यासपीठावर सूत्रसंचालन करीत होते. स्थानिक कार्यकर्त्यांना हाताशी धरून राजकीय पक्षाचे नेते कर्जमाफीचे श्रेय घेण्यासाठी डावपेच खेळत आहेत. त्यातून स्थानिक पातळीवरील कार्यकर्त्यांच्या एकमेकांवर कुरघोडय़ा सुरू झाल्या आहेत.

ठाकरे व विरोधी पक्षनेते विखे यांच्यात राजकीय वैमनस्य आहे. विखे हे काही काळ शिवसेनेत होते. माजी खासदार दिवंगत बाळासाहेब विखे यांना केंद्रात तर राधाकृष्ण विखे यांना राज्यात सेनेमुळे मंत्रिपद मिळाले होते. त्यांनी सेनेला जय महाराष्ट्र करत काँग्रेसमध्ये प्रवेश केला. त्याचे शल्य ठाकरे यांना आजही आहे. मेळाव्यात केवळ विखे यांच्यावर संप फोडल्याची वैयक्तिक टीका त्यांनी तर केलीच, पण विखे यांच्या कुटुंबात सुरू झालेल्या गृहकलहातही उडी घेतली. विखे व त्यांचे बंधू डॉ. अशोक विखे यांच्यात प्रवरा शिक्षण संस्थेच्या वर्चस्वावरून वाद सुरू आहेत. लोणी येथील डॉ. विखे यांच्या शाळेकडे जाणारा रस्ता बंद करण्यात आला. त्याविरुद्ध डॉ. विखे यांनी संघर्ष सुरू केला आहे. ठाकरे यांची भेट घेतल्यानंतर त्यांनी डॉ. विखे यांना मदत करण्याचे जाहीर केले.

पुणतांबे गावातील दोन गटांनी संप दोनदा मागे घेतला. त्या वेळी अजित नवले यांनी संप पुढे सुरू ठेवण्याची स्पष्ट भूमिका घेतली. स्वाभिमानी शेतकरी संघटनेचे अध्यक्ष खासदार राजू शेट्टी, शेतकरी संघटनेचे अध्यक्ष रघुनाथदादा पाटील यांनी संपाला पाठिंबा दिला. त्यांचे कार्यकत्रे रस्त्यावर उतरले होते. जिल्ह्यतील ७५० हून अधिक कार्यकर्त्यांवर गुन्हे नोंदविले गेले. अनेकांना अटक झाली. अनेकजण तुरुंगात होते. त्यांना कोणीही भेटायला गेले नाही. त्यांच्यावरील खटले सुरु आहेत. उच्च न्यायालयापर्यंत अनेकांना जामिनासाठी जावे लागले. त्यांची आठवण कोणालाच आली नाही.

ठाकरे यांच्या दौेऱ्यात त्यांनी घोषणाबाजी केली. आता सरकारकडून खटले मागे घ्यायला लावू, असे आश्वासन मिळाले. ज्यांच्या पाठीवर पोलिसांनी वळ उमटविले ते अद्याप पुसले गेलेले नाही. त्यांना मात्र सारेच विसरले.

पहिल्यांदा विरोधी पक्षनेते राधाकृष्ण विखे-पाटील यांच्या मदतीने संप फोडल्याचे खापर डॉ. धनवटे यांच्यावर तर नंतर आमदार स्नेहलता कोल्हे यांच्या मदतीने संप फोडल्याचे खापर जाधव यांच्यावर फोडण्यात आले. संपानंतर डॉ. धनवटे आणि जाधव हे दोघेही एकाच व्यासपीठावर होते हे विशेष.

पुणतांबे गावात शेतकरी संपानंतर आता पक्षीय कुरघोडय़ा सुरू झाल्या आहेत. गावाबाहेरच्या मोठय़ा नेत्यांच्या हस्तक्षेपाचा तो परिपाक आहे. माध्यमांसमोर काही चमकोगिरी करणारे उतावीळ झाले आहेत. आता इथे काहीही घडत असले तरी गावाला दोष देता येणार नाही. एक चांगले काम झाले, कर्जमाफीचा ऐतिहासिक निर्णय झाला. मोठे काम उभे राहिल्याचा आनंद आहे. कुरघोडय़ा, मतभेद या छोटय़ा गोष्टी आहेत.

– सुहास वहाडणे, माजी जिल्हाप्रमुख शिवसेना, नगर