राहाता : नगर- मनमाड महामार्गावर, कोपरगावनजीक भास्करवस्ती येथे खासगी आरामबस व एका मोटारीच्या धडकेनंतर, मोटार पेटली व या आगीत कारचालकाचा होरपळून मृत्यू झाला. हा अपघात काल, शुक्रवारी रात्री साडेदहाच्या सुमारास घडला. अपघातानंतर नगर-मनमाड महामार्गावर दोन्ही बाजूने वाहनांच्या लांबच लांब रांगा लागल्या होत्या.
कोपरगावहून येवल्याच्या दिशेने जाणारी खासगी प्रवासी आरामबस (क्रमांक एएस ०१ क्यूसी ३५१६) ही भास्करवस्ती येथे आली असता येवल्याकडून कोपरगावकडे जाणारी मोटार या दोन वाहनांची समोरासमोर धडक झाली. धडक इतकी भीषण होती की, मोटारीला आग लागली. त्या आगीत चालकासह मोटार पूर्ण जळून खाक झाली आहे. मुजाईद पप्पू शेख असे मृत चालकाचे नाव आहे. तो नाशिक जिल्ह्यातील विंचूर येथील असल्याची माहिती पोलिसांकडून मिळाली.
यावेळी स्थानिक नागरिकांनी अग्निशमन दलाला माहिती दिली. कोपरगाव व येवला नगरपालिका अग्निशामक दलाच्या पथकांनी आगीवर नियंत्रण मिळवण्यासाठी प्रयत्न केले. यावेळी नगर-मनमाड महामार्गावर लांबच लांब वाहनांच्या रांगा लागलेल्या होत्या. स्थानिक नागरिकांनी बसमधील प्रवाशांना वाचवण्यासाठी मोठे प्रयत्न केले. कोपरगाव शहर पोलीस ठाण्यात अपघाताची नोंद करण्यात आली आहे.
