सातारा : साताऱ्यातील कास परिसरातील वजराई धबधबा पाहून साताऱ्याकडे माघारी येत असताना पर्यटकांच्या एका खासगी बसला खोल खड्ड्यात कोसळून झालेल्या अपघातात पाच जण किरकोळ जखमी झाले. बुधवारी दुपारी हा अपघात झाला. जखमी पर्यटकांना साताऱ्यातील शासकीय रुग्णालयात उपचारासाठी दाखल करण्यात आले आहे. वजराई धबधबा पाहायला आलेले पर्यटक कोल्हापुरचे होते.
साताऱ्यातील कास परिसरातील वजराई धबधबा पाहण्यासाठी हे पर्यटक खासगी बसने आले होते. धबधबा पाहून झाल्यावर ते परतत असताना तांबी गावच्या हद्दीत एका अवघड वळणावर चालकाचा ताबा सुटल्यामुळे बस दहा ते पंधरा फूट खोल खड्ड्यात कोसळली. या अपघातात बसमधील पाच पर्यटक किरकोळ जखमी झाले.
त्यांना साताऱ्यातील शासकीय रुग्णालयात उपचारासाठी दाखल करण्यात आले आहे. या अपघाताची माहिती समजताच पोलीस प्रशासनाने धाव घेत जखमी पर्यटकांना साताऱ्यात शासकीय रुग्णालयात दाखल केले.
