ख-या समतेसाठी महायुतीला निवडा- फडणवीस

राज्यात ख-या अर्थाने समता आणायची असेल तर महायुतीला निवडा. बा विठ्ठला, पांडुरंगा यासाठी शक्ती दे अन् येणा-या आषाढी एकादशीची महापूजा करण्याचा अग्रपूजेचा मान शेतक-याच्या, कष्टक-याच्या वर्गातून आलेल्या मुलाला मिळू दे, असे साकडे घालत भाजप प्रदेशाध्यक्ष देवेंद्र फडणवीस यांनी ‘महायुती’तील स्वाभिमानी शेतकरी संघटनेचे उमेदवार प्रशांत परिचारक यांच्या प्रचाराचा नारळ आज येथे फोडला.
या वेळी खासदार राजू शेट्टी, महायुतीचे उमेदवार संजय पाटील घाटणेकर, पांडुरंग परिवाराचे कुटुंबप्रमुख माजी आमदार सुधाकर परिचारक, स्वा.शेतकरी संघटनेचे जिल्हाध्यक्ष दीपक भोसले, भाजपचे शिवाजी वाघमारे, जिल्हा महिला अध्यक्षा शकुंतला नडगिरे, बादल ठाकूर, दत्ता रजपूत, वालजी जामदार, भाजपचे अविनाश कोळी यांच्यासह आरपीआय, शेतकरी संघटनेचे प्रमुख पदाधिकारी उपस्थित होते.
फडणवीस म्हणाले, की ११ लाख ८८ हजार कोटींचा घोटाळा या भ्रष्ट सरकारने केला. सरकारच्या तिजोरीवर राज्यकर्त्यांनी दरोडा घालून महाराष्ट्राला कर्जाच्या खाईत बुडविले. प्रत्येक व्यक्तीच्या डोक्यावर २७ हजार रूपये कर्जाचा बोजा ठेवला. नुसत्या विकासाच्या वल्गना केल्या परंतु विकास झाला नाही. असे भ्रष्ट घोटाळेबाज सरकार उलथवून टाकून शेतक-यांचे, शेतमजुरांचे हित जाणारे सरकार निवडून द्या, असे आवाहन केले.
या मतदारसंघातील पाण्याचा प्रश्न विशेषत मंगळवेढा तालुक्यातील ३५ गावचा पाणी प्रश्न गंभीर असून नुसता कागदोपत्री मान्यता मिळवून उपयोग नाही. कागदावर पाणी परवानगी मिळाली परंतु प्रत्यक्षात मात्र पाणी आणण्यासाठी तिजोरीत खडखडाट असून नुसत्या पाणी आणतो अशा वल्गना केल्या. केंद्रात नरेंद्र मोदींचे सरकार असून राज्यातही महायुतीचे सरकार स्थापन करा. सरकार आल्यानंतर दोन वर्षांत केंद्राच्या मदतीने तातडीने ५५० कोटी मंजूर करून पाणी प्रश्न मार्गी लावतो, त्याकरिता विकासाची जाण असलेला दृष्टी असलेला परिचारक सारखा आमदार विधानसभेत पाठवा, तुमचे प्रश्न सोडविले जातील याची मी ग्वाही देतो, असे फडणवीस यांनी सांगितले.
नदी कृती कार्यक्रमातून गंगेबरोबरच चंद्रभागा स्वच्छ, शुध्द ठेवण्यासाठी प्रयत्न केला जाईल, असेही फडणवीस यांनी सांगितले.
शेट्टी म्हणाले, की पंढरपूर बारामती अशी पदयात्रा काढून आपण बारामतीकरांना धक्के दिले. या उलटी वारीमुळे शेतक-यांना न्याय मिळाला. केंद्रातील घोटाळेबाज भ्रष्ट सरकार गेले. आताही राज्यातील सरकार उलथून पडेल. पाण्यासाठी जलसंपदामंत्र्यांनी सोय करण्याचे सोडून धरणात लघुशंकेची भाषा करणा-या अजित पवारांना त्यांची जागा दाखवून द्या, असे आवाहन त्यांनी या वेळी केले.
परिचारक म्हणाले, की वर्षांनुवष्रे सरकार तेच आहे. नेते अनेक होऊन गेले परंतु विकासाचे प्रश्न म्हणावे तसे सुटले नाहीत. लोकांना आता बदल हवा आहे. शेतक-यांना शाश्वत असे वीज, पाणी, हमी भाव याची खात्री पाहिजे. तर बेकार युवकांच्या हाताला काम पाहिजे. हे काम मोदी सरकार देण्यास सक्षम असून राज्यातही याकरिता युतीला निवडून द्या.