Maratha Reservation सातारा : मराठा समाजाला आरक्षण मिळवून देण्यासाठी मुख्यमंत्री देवेंद्र फडणवीस, उपमुख्यमंत्री अजित पवार, एकनाथ शिंदे सकारात्मक आहेत. फडणवीस हेच गरजू मराठा समाजाला आरक्षण मिळवून देतील, असा विश्वास सार्वजनिक बांधकाम मंत्री शिवेंद्रसिंहराजे भोसले यांनी व्यक्त केला आहे.
शिवेंद्रसिंहराजे पत्रकारांशी साताऱ्यात बोलताना म्हणाले, की मराठा समाजाला आरक्षण मिळूच शकणार नाही, असे काही लोक म्हणत होते. त्या वेळी मुख्यमंत्री देवेंद्र फडणवीस यांनी मराठ्यांना आरक्षण मिळवून दिले होते. मात्र, फडणवीस यांचे सरकार पायउतार झाल्यानंतर काही लोक मराठ्यांच्या आरक्षणाविरोधात न्यायालयात गेले होते. न्यायालयाने हे आरक्षण रद्द केल्याने या आरक्षणाचा लाभ समाजाला मिळू शकला नव्हता.
मराठा समाजातील गरजू लोकांना आरक्षण मिळावे, यासाठी मनोज जरांगे पाटील यांचे आंदोलन सुरू आहे. न्याय्य हक्कासाठी लढणे, हा प्रत्येकाचा अधिकार आहे. मराठा समाजाला आरक्षण मिळाले पाहिजे. मात्र, ते घटनेत आणि कायद्यात टिकायला हवे. जरांगे पाटील यांच्या मुद्द्याला आमचा सगळ्यांचाच पाठिंबा आहे. त्यांना आम्ही भेटलो होतो. समाजाच्या गरजेचा हा मुद्दा आहे. सरकारसोबत चर्चा केल्याशिवाय हा मुद्दा सुटणार नाही. चर्चा करून आरक्षण आपल्या पदरात कसे पडेल, हे मराठा समाजाने पाहावे. मीही मराठा समाजातील आहे. समाजातील अनेक घटकांची स्थिती अत्यंत वाईट आहे. या समाजातील एक व्यक्ती म्हणून गरजू मराठ्यांसाठी आरक्षण आवश्यक आहे, असे माझे स्पष्ट मत आहे. महायुतीचे सरकार मराठा समाजाच्या आरक्षणासाठी आग्रही आहे. देवेंद्र फडणवीस, उपमुख्यमंत्री अजित पवार, एकनाथ शिंदे हेच मराठा समाजाला आरक्षण मिळवून देतील, असा विश्वासही शिवेंद्रसिंहराजेंनी व्यक्त केला.
