लोकसत्ता प्रतिनिधी सांगली : मिरजेत विसर्जन मिरवणुकीत एका अज्ञाताचा मृत्यू झाला असून गेल्या २८ तासाहून अधिक काळ मिरवणुक सुरु आहे. मिरवणूक संपण्यास अजून तीन तास लागण्याचा अंदाज आहे. मिरज मध्ये गणेश विसर्जन मिरवणूक मार्गावर एका व्यक्तीचा रात्री संशयास्पद मृतदेह आढळला. मृत्यूमागचे नेमके कारण अद्याप अस्पष्ट, मृतदेहाची ओळखही अद्याप पटली नाही. हृदयविकाराचा झटका येऊन मृत्यू झाल्याची प्राथमिक माहिती असून वैद्यकीय अहवालाची प्रतीक्षा आहे. आणखी वाचा-मिरवणुकीतील आवाजाने दोघांचा हृदयविकाराने मृत्यू ; ११ जणांविरुध्द गुन्हा दाखल दोन दिवसापुर्वी दुधारी व कवठे एकंद येथे मिरवणुकीवेळीच दोन तरुणांचा मृत्यू झाला होता. यामुळे अज्ञाताचा मृत्यूही ध्वनीवर्धकाचा दणदणाट असह्य झाल्याने हृदयविकाराचा धक्का बसून मृत्यू झाला असावा अशी शक्यता वर्तवली जात आहे. भरपावसात ध्वनीवर्धकाच्या दणदणाटात विसर्जन मिरवणूक सुरु होती. रात्री बारा वाजता वाद्य बंद झाली असली तरी विसर्जन स्थळी गणेश तलावाकडे जाण्यासाठी एकच मार्ग असल्याने मिरवणुक रेंगाळली आहे.
