शिवसेनाप्रमुख बाळासाहेब ठाकरे यांच्या स्मृतीदिनाच्या पूर्वसंध्येला शिवाजी पार्कवर शिवसेनेचे दोन्ही गट आमने-सामने आले. यावेळी शिंदे गट व ठाकरे गटाच्या कार्यकर्ते व पदाधिकाऱ्यांमध्ये बाचाबाची झाली. धक्काबुक्कीचेही आरोप झाले. या मुद्द्यावरून सध्या दोन्ही गट एकमेकांवर आरोप-प्रत्यारोप करताना दिसत आहेत. ठाकरे गटाकडून यासंदर्भात शिंदे गटावर परखड शब्दांत टीका करण्यात आली आहे. सामना अग्रलेखाच्या माध्यमातून शिंदे गटाला लक्ष्य करण्यात आलं आहे. ‘बाळासाहेब ठाकरे हे निष्ठावंतांचे बाप आहेत व राहतील’, अशा शब्दांत ठाकरे गटानं हल्लाबोल केला आहे.
‘मराठी माणसांत फूट पाडून दिल्लीचा सुलतान…’
‘शिवतीर्थावर जे घडले, ते दुर्दैवी असल्याचे मत काही लोकांनी व्यक्त केले. मराठी माणसांत फूट पाडून, संघर्ष घडवून दिल्लीचा सुल्तान मजा पाहत आहे, हे दुर्दैवच आहे. पण हा संघर्ष अटळही आहे. शिवसेनाप्रमुखांच्या विचारांशी प्रतारणा करणाऱ्यांनी तेथे यावे व श्रद्धेचा बाजार मांडावा हे योग्य नाही’, अशा शब्दांत अग्रलेखातून भूमिका मांडण्यात आली आहे.
‘मिंधे गट स्वत:ला रिपब्लिकन पक्षही समजू शकतो’
दरम्यान, शिंदे गटाकडून आपणच शिवसेना असल्याच्या दाव्याची ठाकरे गटाकडून खिल्ली उडवण्यात आली आहे. ‘मिंधे गट स्वतःला ‘शिवसेना’ मानतो. हा गट उद्या स्वतःला अमेरिकेतील रिपब्लिकन, डेमोक्रॅट किंवा इंग्लंडमधील हुजूर किंवा मजूर पक्षही समजू शकतो. तो त्यांचा प्रश्न. चार आण्याची भांग प्यायले किंवा रुपयाचा गांजा चिलमीत भरून मारला की अशा कल्पना सुचतात. इथे तर खोकेच खोके असल्याने उच्च प्रतीचे नशापाणी करून कल्पना सुचत असतील’, असं अग्रलेखात म्हटलं आहे.
बॅनर्स लागूनही पंकजा मुंडे ओबीसी मेळाव्याला अनुपस्थित, कारण सांगताना म्हणाल्या, “आमच्या पक्षाकडून…!”
‘शिवसेनेतील फुटीर गटाविरोधात लोकमत बिथरले आहे. त्यामुळे या गटातील काही खासदार व आमदारांनी असे जाहीर केले की, “गरज पडली तर आम्ही कमळ चिन्हावर लढू.” आता कमळ चिन्हावर लढू असे सांगणाऱयांची ‘शिवसेना’ कशी? व कमळाबाईच्या ओटीत शिरलेले ‘शिवसैनिक’ कसे? त्यामुळे ही ओटी शिवतीर्थावर पोहोचताच शिवसैनिकांनी त्यांना अडवले’, असंही ठाकरे गटानं म्हटलं आहे.
‘बाळासाहेब ठाकरे हे निष्ठावंतांचे बाप आहेत’
‘शिवसेनाप्रमुखांच्या स्मृतीस्थळावर कमळाबाई पुरस्कृत काही लोक, बाळासाहेब हे आमचेही ‘बाप’ असल्याचे तावातावाने बोलत होते. ते ऐकून लोकांचे हसून पोट दुखले. बाळासाहेब हे निष्ठावंतांचे ‘बाप’ आहेत व राहतील. मिंधे गटास एक तर बाप नसावा व असलाच तर तो गुजरात किंवा दिल्लीत असावा. कारण ज्या बेफाम पद्धतीने ते लोक वागत आहेत व महाराष्ट्रविरोधी कारस्थानांत सहभागी होत आहेत ते पाहता यांचा बाप शिवरायांच्या मातीत व बाळासाहेब ठाकरे यांच्या शिवसेनेत असूच शकत नाही’, अशा शब्दांत ठाकरे गटानं शिंदे गटावर हल्लाबोल केला आहे.
