“आता फक्त रामदास कदम नावाचा बाल्या शिल्लक, किल्ला तर…”, ठाकरे गटाचं टीकास्र; दिलं जाहीर आव्हान!

संजय कदम यांनी नुकताच ठाकरे गटामध्ये प्रवेश केला आहे. आज एकनाथ शिंदेंच्या सभेच्या पार्श्वभूमीवर टीव्ही ९ शी बोलताना संजय कदम यांनी खोचक शब्दांत रामदास कदमांना लक्ष्य केलं आहे. तसेच, त्यांनी रामदास कदम यांचे पुत्र योगेश कदम यांनाही सल्ला दिला आहे.

“रामदास कदमांच्या डोळ्यांवर झापड”

रामदास कदमांच्या डोळ्यांवर झापड असल्याचं संजय कदम म्हणाले. “खेडच्या सभेला आलेल्या स्थानिक लोकांना सगळं माहिती आहे. कदाचित रामदास कदमांच्या डोळ्यांवर झापड आहे. मतदारसंघातले लोक त्यांना ओळखत नाहीत. त्यांचे सख्खे भाऊ, त्यांचे पुतणे, त्यांच्या गावातले सरपंच, त्यांचे शाखाप्रमुख हे सगळे सभेला होते. त्यांना जर हे लक्षात येत नसेल, तर स्थानिक काय, बाहेरचे काय? त्यामुळे रामदास कदम यांच्या पायाखालची वाळू सरकू लागली आहे”, असं संजय कदम म्हणाले आहेत.

“किल्ला कधीच हातातून निसटलाय”

“खेड म्हणजे रामदास कदम यांचा बालेकिल्ला म्हटलं जायचं. पण आता फक्त रामदास कदम नावाचा बाल्या शिल्लक आहे. बाकी किल्ला कधीच त्यांच्या हातातून गेला आहे. तो किल्ला हातातून गेल्यामुळेच रामदास कदम सातत्याने काहीतरी बोलत असतात. योगेश कदम कधी गावचा सरपंच झालेला नाही, पंचायत सदस्य, जिल्हा परिषद सदस्य झालेला नाही. मी जिल्हा परिषद सदस्य, पंचायच समिती, सरपंच ते आमदार झालो आहे”, असंही संजय कदम यांनी यावेळी म्हटलं.

“योगेश कदमच्या पाठिशी चार वर्षं बाप आहे. त्याला खेडमधलं काय माहिती आहे? रामदास कदमचा बाप, त्याचा पर्यावरणातला लुटलेला पैसा याच्यातून त्यांची आमदारकी आहे ना. तुम्ही चालवलेली नाटकं लोकांना माहिती आहे. आता तुझी आमदारकी बघ. शिवसैनिक होते म्हणून तुला आमदारकी मिळाली. आता तुला उद्धव ठाकरे गटाची माणसं नकोच आहेत. तुझ्या पाठिशी आहे कोण?” असा सवाल त्यांनी योगेश कदम यांना केला आहे.

रामदास कदमांना आव्हान

“रामदास कदम २००९ ला खेडमधून पराभूत झाले. भास्कर जाधवबरोबर खेड, गुहागर जोडला आहे. भास्कर जाधवांनी यांचा दारूण पराभव केला आहे. आता तर डिपॉझिटही जाईल. दुसऱ्या-तिसऱ्याची नावं सांगण्यापेक्षा रामदास कदमनीच तिथून भास्कर जाधवांच्या विरोधात उभं राहून दाखवावं”, असं आव्हानदेखील संजय कदम यांनी रामदास कदम यांना दिलं आहे.