शिंदे गटात प्रवेश केलेल्या मनिषा कायंदे अपात्र ठरणार? कायदेतज्ज्ञ उज्ज्वल निकम म्हणाले…

निवडणूक आयोगाच्या निर्णयानुसार, शिंदे गट हा शिवसेनेचा अधिकृत पक्ष आहे. शिंदे गटालाच अधिकृत पक्षाची मान्यता मिळाली आहे. त्यामुळे मनिषा कायंदे यांची अपात्रता मानली जाणार नाही, अशी प्रतिक्रिया उज्ज्वल निकम यांनी दिली. ते ‘टीव्ही ९ मराठी’शी बोलत होते.

हेही वाचा- मनिषा कायंदेंची ठाकरे गटातून हकालपट्टी, पक्षविरोधी कारवाया केल्यामुळे मोठा निर्णय

मनिषा कायंदेंच्या अपात्रतेच्या चर्चेवर प्रतिक्रिया देताना उज्ज्वल निकम म्हणाले, “निवडणूक आयोगाच्या निर्णयानुसार, शिवसेनेचा अधिकृत पक्ष म्हणून शिंदे गटाला मान्यता मिळाली आहे. त्यामुळे विधानपरिषदेच्या विद्यमान आमदार मनिषा कायंदे यांनी आपण शिंदे गटात प्रवेश करत आहोत, असं जरी जाहीर केलं तरी त्यांची अपात्रता मानली जात नाही.”

हेही वाचा- “४० कोटींच्या फाईलमुळे मनिषा कायंदे शिंदे गटात”; राऊतांच्या आरोपावर कायंदेंचं उत्तर

“याचं कारण म्हणजे, मनिषा कायंदेंचा युक्तिवाद असा असू शकतो की, मी शिवसेनेतच आहे. मी शिवसेना सोडली नाही. पण हा निर्णय अर्थात विधान परिषदेच्या सभापतींना घ्यायचा आहे. १० व्या परिशिष्टानुसार मनिषा कायंदे अपात्र ठरतात की नाही? याबाबतचा अंतिम निर्णय विधान परिषदेचे सभापतीच घेऊ शकतात,” असंही उज्ज्वल निकम म्हणाले.