अभिनेता अमिताभ बच्चन यांना करोनाची लागण झाली आहे. त्यामुळे सध्य मुंबईतील नानावटी रुग्णालयात त्यांच्यालवर उपचार सुरु आहेत. या काळात ते सोशल मीडियावर सक्रिय असून चाहत्यांच्या संपर्कात आहेत. यामध्ये त्याने रुग्णालयातील डॉक्टर आणि अन्य कर्मचाऱ्यांसाठी एक खास पोस्ट शेअर केली आहे. यात त्यांनी रुग्णालयातील प्रशासनाचे आभार मानले आहेत.

अमिताभ बच्चन यांनी ट्विटरवर एक पोस्ट शेअर करत डॉक्टर आणि अन्य कर्मचाऱ्यांना पीपीई किटमध्ये देवदूत आहेत असं म्हटलं आहे. “ते कोणत्याही बिकट परिस्थितीत काम करत असतात. त्यामुळेच आज आपण सुरक्षित आहोत. डॉक्टर, परिचारिका आणि अन्य कर्माचारी हे देवाचे दूत आहेत. पांढऱ्या पीपीई किटमधील देवाचे दूत. परंतु, तरी सुद्धा ते रुग्णांच्या आरोग्याची देवाकडे प्रार्थना करत असतात”, असं ट्विट अमिताभ बच्चन यांनी केलं आहे.

दरम्यान, करोनाची लागण झाल्यामुळे बिग बी आणि अभिषेक बच्चन नानावटी रुग्णालयात दाखल आहेत. त्यांच्यासोबत ऐश्वर्या आणि आराध्यालादेखील करोनाची लागण झाली होती. परंतु, त्या दोघांचीही चाचणी निगेटिव्ह आली असून त्यांना रुग्णालयातून डिस्चार्ज मिळाला आहे.