पुलवामा दहशतवादी हल्ल्याचा बदला घेत भारताने पाकस्तानच्या हद्दीत घुसून हवाई हल्ला केला. त्यानंतर, बुधवारी पाकिस्ताननेही भारताच्या हद्दीत घुसण्याचा अयशस्वी प्रयत्न केला. सीमेवर पाकिस्तानचा गोळीबार, तोफांचा भडिमार आणि लढाऊ विमानांचा घुसखोरीचा प्रयत्न सुरूच होता. भारताने पाकिस्तानचे एक लढाऊ विमान पाडले असून त्यावेळी आपले मिग २१ विमान पाकिस्तानी हद्दीत कोसळून विंग कमांडर अभिनंदन वर्धमान यांना पाकिस्तानने ताब्यात घेतले. त्यांना सहीसलामत भारतात आणण्यासाठी केंद्र सरकारचे प्रयत्न सुरू आहेत. संपूर्ण देश आणि बॉलिवूड सेलिब्रिटीसुद्धा पुढे येत अभिनंदन यांच्या सुखरुप वापसीसाठी प्रार्थना करत आहेत.

बॉलिवूडचे महानायक अमिताभ बच्चन यांनी ‘शीश झुका कर.. अभिनंदन’, असे ट्विट केले आहे. अभिनंदन यांच्या सुरक्षित वापसीची प्रार्थना करत त्यांनी तिरंग्याचा इमोजी शेअर केला आहे. तर ज्येष्ठ अभिनेते अनुपम खेर यांनी अभिनंदन यांचा एक फोटो शेअर कवितेच्या काही ओळी लिहिल्या आहेत.

विंग कमांडर अभिनंदन यांचे व्हिडिओ सोशल मीडियावर शेअर करणं थांबवा असं आवाहान अभिनेत्री रेणुका शहाणेंनी केले आहे. ‘परिस्थितीचा सामना करण्यासाठी आपले हवाई दल सज्ज आहे. पण अभिनंदन यांचा व्हिडिओ शेअर करणं थांबवा. आपल्या बेजबाबदार वागणुकीने त्यांच्या कुटुंबीयांना त्रास होणार नाही याची काळजी घ्या,’ असं ट्विट रेणुका यांनी केले आहे.

‘उरी : द सर्जिकल स्ट्राइक’ फेम अभिनेता विकी कौशल, हृतिक रोशन, फरहान अख्तर या अभिनेत्यांनीही ट्विट करत अभिनंदन यांच्या वापसीसाठी प्रार्थना केली आहे.