गेल्या सहा वर्षांपासून अवितरतपणे प्रेक्षकांचं मनोरंजन करणारा कार्यक्रम म्हणजे 'चला हवा येऊ द्या'. आतापर्यंत या कार्यक्रमामधील कलाकारांनी प्रेक्षकांना खळखळून हसवलं.त्याचसोबत या मंच्याच्या माध्यमातून अनेक दिग्गज कलाकारदेखील प्रेक्षकांच्या भेटीला आले. विशेष म्हणजे लवकरच या कार्यक्रमामध्ये दिग्गज व्यक्ती पाहायला मिळणार आहेत. 'चला हवा येऊ द्या' या कार्यक्रमात येत्या आठवड्यात प्रजासत्ताक दिन विशेष आठवडा साजरा केला जाणार आहे. या भागामध्ये आयपीएस ऑफिसर विश्वास नांगरे पाटील, ज्येष्ठ सरकारी वकील उज्वल निकम, डॉ. तात्याराव लहाने आणि डिसले गुरुजी अशी दिग्गज मंडळी सहभागी होणार आहेत. विविध क्षेत्रात कार्य करणारी ही दिग्गजमंडळी या कार्यक्रमात प्रेक्षकांशी संवाद साधणार आहेत. सोबतच त्यांचे अनुभवदेखील शेअर करणार आहेत. येत्या २५ ते २७ जानेवारी दरम्यान हा विशेष भाग रंगणार आहे.
