अभिनेता सुशांत सिंह राजपूतच्या आत्महत्येनंतर त्याचे अनेक जुने फोटो व व्हिडीओ सोशल मीडियावर व्हायरल होऊ लागले. त्यातच त्याच्या एका जुन्या मुलाखतीचा व्हिडीओ सध्या चर्चेचा विषय ठरतोय. या मुलाखतीत सुशांतने अभिनेत्री व 'पवित्र रिश्ता' मालिकेतील सहकलाकार अंकिता लोखंडेवर असलेलं प्रेम व्यक्त केलं होतं. "मोहब्बत में नहीं है फर्क जीने और मरने का, उसी को देखकर जीते है जिस काफिर पर दम निकले", या ओळी म्हणत पुढे सुशांत अंकिताचा उल्लेख करतो. "गेल्या सहा वर्षांत अंकिताने मला खूप धीर दिला. माझ्यासोबत राहण्यासाठी ती नेहमी उत्सुक असते. माझंही तिच्यावर खूप प्रेम आहे आणि मलाही तिच्यासोबत राहायचं आहे. कोणतंही नातं तोडायचं असेल तर आपण क्षणार्धात कारण शोधू शकतो. पण जर ते नातं टिकवायचं असेल तर त्यासाठी खूप प्रयत्न करणं गरजेचं असतं. तिच्याशिवाय मी राहू शकत नाही आणि याच कारणामुळे मी अनेकदा भावूक होतो", अशा शब्दांत तो भावना व्यक्त करतो. 'पवित्र रिश्ता' या मालिकेच्या सेटवर सुशांत आणि अंकिता यांची प्रेमकहाणी सुरू झाली. सहा वर्षे हे दोघं एकत्र होते. मालिकेपासून चित्रपटापर्यंतच्या सुशांतच्या प्रवासात अंकिता त्याच्यासोबत होती. मात्र काही कारणास्तव त्यांचा ब्रेकअप झाला होता. सुशांतच्या आत्महत्येनंतर अंकिताने त्याच्या कुटुंबीयांची भेट घेतली होती.
