…म्हणून प्रिया वारियर मोबाइल वापरत नाही

प्रकाश वारियर यांनी दिलेल्या माहितीनुसार त्यांची मुलगी म्हणजे प्रिया, मोबाइल वापरत नाही. तिला तशी परवानगीच नाही. हल्लीच्या तरुणाइसाठी मोबाइल हे अतिसामान्य उपकरण झालं असलं तरीही, प्रियाकडे असणाऱ्या मोबाइलमध्ये मात्र साधं सिम कार्डही नाही. त्यामुळे फोन करण्यासाठी आणि इतरांशी संवाद साधण्यासाठी तिला आईच्याच फोनवर अवलंबून रहावं लागत असल्याची माहिती तिच्या वडिलांनी दिली.

आता तुम्ही म्हणाल सोशल मीडियावर तर ती बऱ्यापैकी सक्रिय आहे, मग मोबाइल वापरत नाही हे कसं शक्य आहे? याचा उलगडा तिच्या वडिलांनीच केला आहे. प्रियाकडे असणाऱ्या फोनमध्ये ती हॉटस्पॉट सुरु असतानाच इंटरनेटवर उपलब्ध असणाऱ्या सेवांचा वापर करु शकते, असं त्यांनी सांगितलं.

प्रियाच्या गाण्याचा तो व्हिडिओ व्हायरल झाला त्यावेळच्या एका प्रसंगाविषयीसुद्धा प्रकाश वारियर यांनी सांगितलं. ‘प्रियाचा व्हिडिओ व्हायरल झाला तेव्हा माझ्या एका सहकाऱ्यानेच तो मला पाठवला. तो व्हिडिओ पाहून ही माझीच मुलगी आहे, हे जेव्हा त्याला कळलं तेव्हा तो नि:शब्दच झाला’, असं ते म्हणाले. प्रिया ही एक सर्वसामान्य पण, प्रचंड महत्त्वाकांक्षी मुलगी असून तिचं संगोपनही तसच झालं असल्याचं त्यांनी स्पष्ट केलं.

वाचा : ‘व्हायरल’ची गंभीर साथ!

सोशल मीडियावर कमालीची प्रसिद्ध असणारी प्रिया या माध्यमातून आता घसघशीत कमाइही करु लागली होती. पण, सूत्रांनी दिलेल्या माहितीनुसार इन्स्टाग्राम प्रोफाइलच्या माध्यमातून काही ब्रँडचं प्रमोशनही केल्यानंतर आता यापुढे ती ब्रँडचं प्रमोशनही करणार नसल्याची माहिती ‘उरु अदार लव्ह’च्या दिग्दर्शकांच्या पब्लिसिटी मॅनेजरने दिली.

मोबाइल न वापरणारी प्रिया अनेकांसाठी नवीन असून, सध्या तिच्या वडिलांनी केलेल्या या उलगड्यामुळे बऱ्याच चर्चा रंगण्यास सुरुवात झाली आहे. पण, करिअरच्या दृष्टीनेच हे निर्णय घेतल्याचं म्हटलं जात आहे. चित्रपटसृष्टीत पदार्पण करण्यापूर्वीच प्रकाशझोतात आलेल्या प्रियाला बॉलिवूड चित्रपटाचीही ऑफर मिळाल्याचं म्हटलं जात आहे. रोहित शेट्टी दिग्दर्शित ‘सिम्बा’ या चित्रपटातून ती अभिनेता रणवीर सिंगसोबत झळकणार असल्याच्या चर्चा आहेत. पण, याविषयीची अधिकृत माहिती अद्यापही देण्यात आलेली नाही.