‘गली बॉय चित्रपटाचा माझ्या खाजगी आयुष्यावर परिणाम झाला’ रॅपर नेझीने सांगितली आपबिती

घरातील इतर सदस्यांबरोबर बोलत असताना नॅझीने ‘गली बॉय’ या चित्रपटाबाबत वक्तव्य केले आहे. तो म्हणतो, माझे ‘आफत’ हे गाणे त्यावेळी प्रदर्शित झाले होते आणि त्याला यश मिळत होते. ते गाणे ऐकल्यानंतर जोया अख्तर यांनी मला शोधून काढले. त्यांना हे गाणे आणि त्याचा जॉनर खूप आवडला. मात्र, ‘गली बॉय’ चित्रपटाची कथा काल्पनिक असून ती संपूर्ण हिप-हॉप समुदायाची गोष्ट आहे. या चित्रपटाचा माझ्या आयुष्यावर चांगल्या आणि वाईट अशा दोन्ही बाजूंनी परिणाम झाला. कारण माझे पहिले गाणे जरी प्रदर्शित झाले असले तरी मला प्रसिद्धीझोतात या चित्रपटाने आणले. बॉलीवूडमध्ये माझी जागा निर्माण झाली. माझा वेगळा चाहतावर्ग निर्माण झाला. मात्र, जसा मला याचा फायदा झाला तसा तोटाही झाला.

कारण रणवीरने जी भूमिका केली आहे, ती माझ्या आयुष्यावर प्रेरित असली तरी त्यामध्ये काही काल्पनिक गोष्टींचादेखील समावेश केला गेला आहे. ज्याप्रमाणे रणवीरने चित्रपटात मुराद अहमदची भूमिका केली आहे, तो संपूर्ण मीच आहे असे प्रेक्षकांना वाटत होते. त्यामुळे लोकांनी माझ्याकडे नकारात्मक दृष्टीने बघायला सुरुवात केली. या सगळ्याचा माझ्या मानसिक आरोग्यावर आणि खाजगी आयुष्यावर फार मोठा परिणाम झाला. कारण चित्रपटात माझ्या दोन गर्लफ्रेंड दाखवल्या आहेत आणि परिस्थितीदेखील फार गरीब दाखवली आहे, खऱ्या आयुष्यात मात्र मी चित्रपटात दाखवला तितका गरीब नाही. चित्रपटात मी ड्रायव्हर असल्याचे दाखवले आहे, मात्र प्रत्यक्षात तसे नाही.”

दरम्यान, बिग बॉस ओटीटीचे तिसरे पर्व वेगळ्या अंदाजात प्रेक्षकांसमोर आले आहे. यामध्ये १६ स्पर्धकांनी भाग घेतला होता. त्यातील एक स्पर्धक घराबाहेर पडला असून आता १५ स्पर्धक घरात आहेत. अरमान मलिक, पायल मलिक, कृतिका मलिक, चंद्रिका दीक्षित, बॉलीवूड अभिनेता रणवीर शौरी, शिवानी कुमारी, टीव्ही अभिनेत्री सना सुलतान यांचा समावेश आहे. याबरोबरच विशाल पांडे, लव कटारिया, पत्रकार दीपक चौरसिया, अभिनेता साई केतन राव, टॅरो कार्ड रीडर मुनीषा खटवानी, सना सुलतान, रॅपर नॅझी आणि अभिनेत्री पौलामी दास यांचा समावेश आहे