बॉलीवूड सुपरस्टार शाहरुख खान सध्या त्याच्या ‘जवान’ चित्रपटामुळे चांगलाच चर्चेत आहे. नुकताच ‘जवान’चा ट्रेलर सोशल मीडियावर प्रदर्शित करण्यात आला. प्रेक्षकांनी या ट्रेलरला भरभरून प्रतिसाद दिला. शाहरुख सोशल मीडियावर चांगलाच सक्रिय असतो अलीकडेच अभिनेत्याने ‘आस्क एसआरके’ (#AskSRK)सेशन घेतले. या वेळी शाहरुखला त्याच्या चाहत्यांनी काही प्रश्न विचारले. या सर्व प्रश्नांना शाहरुखने भन्नाट उत्तरे दिली आहेत.
हेही वाचा : सुयश टिळकच्या पत्नीची लोकप्रिय हिंदी मालिकेत होणार एण्ट्री; आयुषी अनुभव शेअर करत म्हणाली…
किंग खानला‘आस्क एसआरके’सेक्शनमध्ये त्याच्या चाहत्याने, “तिकीट काढून स्वत:चे चित्रपट पाहतोस का?” असा प्रश्न विचारला यावर शाहरुख भन्नाट उत्तर देत म्हणाला, “तुम्ही केलेल्या कामाचा पगार तुम्ही स्वत: देता का?” सध्या शाहरुखने दिलेल्या उत्तराने सर्वांचे लक्ष वेधून घेतले आहे. जवानचा चित्रपटाचा ट्रेलरला प्रेक्षकांनी चांगला प्रतिसाद दिल्याने त्याने हे ‘आस्क एसआरके’सेशन घेतले होते.
नेटकरी शाहरुखच्या उत्तरावर “एखाद्याला उत्तर कसे द्यायचे हे तुझ्याकडून शिकायला हवे” अशा कमेंट करत आहे. तसेच अनेकांनी शाहरुख खानच्या हजरजबाबीपणाचे कौतुक केले आहे.
दरम्यान, शाहरुख खानचा बहुचर्चित जवान चित्रपट ७ सप्टेंबर २०२३ रोजी प्रेक्षकांच्या भेटीला येणार आहे. यामध्ये शाहरुखसह अभिनेत्री नयनतारा मुख्य भूमिकेत दिसेल. दाक्षिणात्य सुपरस्टार विजय सेतुपती चित्रपटात नकारात्मक भूमिका साकारणार आहेत. ‘पठाण’नंतर शाहरुखचे चाहते आता ‘जवान’ चित्रपटाची आतुरतेने वाट पाहत आहेत.
