बॉलिवूड अभिनेता फरहान अख्तर आणि त्याची गर्लफ्रेंड शिबानी दांडेकर लवकरच लग्न करणार आहे. मागची काही वर्षं एकमेकांना डेट केल्यानंतर येत्या २१ फेब्रुवारीला हे दोघंही लग्नाच्या बेडीत अडकणार असल्याचं बोललं जात आहे. पण फरहाननं जेव्हा शिबानीशी लग्न करण्याचा निर्णय घेतला होता त्यावेळी त्यानं सर्वात आधी त्याच्या आईला सांगितलं होतं. नुकत्याच दिलेल्या एका मुलाखतीत फरहानची आई हनी इरानी यांनी फरहाननं कशाप्रकारे लग्नाची परवानगी मागितली होती याचा खुलासा केला. फरहान अख्तरची आई हनी इराणी म्हणाल्या, ‘मी माझ्या मुलासाठी खूपच उत्साहित आहे. मागच्या बऱ्याच काळापासून मी या दिवसाची वाट पाहत होते. आता अखेर ते दोघं लग्न करत आहेत.जेव्हा फरहाननं शिबानीशी लग्न करण्याचा निर्णय घेतला होता त्यावेळी तो पहिल्यांदा माझ्याकडे आला होता आणि त्याचं शिबानीवर किती प्रेम आहे हे मला सांगितलं होतं आणि तिच्याशी लग्न करण्याची इच्छा व्यक्त केली होती.’ हनी इरानी पुढे म्हणाल्या, ‘फरहान आणि शिबानी यांनी एकत्रच त्यांचा लग्नाचा निर्णय कुटुंबीयांनी सांगितला. त्या दोघांनीही सर्वांसाठी एक डिनर ठेवलं होतं. त्याचवेळी त्यांनी त्यांच्या लग्नाचा निर्णय आम्हाला सांगितला होता. ते दोघंही एकमेकांसोबत आनंदी आहेत. मी तर प्रार्थना करते की, दोघंही असेच आयुष्यभर एकमेकांसोबत आनंदी राहो. ते दोघंही एकमेकांबाबत खूपच गंभीर आहेत. त्यामुळे आम्ही देखील त्यांच्या लग्नाला परवानगी दिली.’