ज्येष्ठ अभिनेते सचिन पिळगांवकर यांनी मराठीसह हिंदी चित्रपटांमध्ये आपल्या अभिनयाचा ठसा उमटवला आहे. त्यांनी हिंदी सिनेसृष्टीतील अनेक दिग्गजांबरोबर काम केलं आहे. बरेचदा सचिन पिळगांवकर काही कलाकारांबरोबरच्या त्यांच्या जुन्या आठवणी सांगत असतात. आता त्यांनी संजीव कुमार यांच्याबरोबरचा एक किस्सा सांगितला आहे.
सचिन पिळगांवकर यांचा पहिला ऑटोग्राफ एका दिग्गज अभिनेत्याने घेतला होता, ते म्हणजे संजीव कुमार. “माझा पहिला ऑटोग्राफ एका माणसाने घेतला होता, ते मी कधीच विसरू शकत नाही. विशू राजे हे माझ्या वडिलांचे मित्र होते. त्यांना ‘हा माझा मार्ग एकला’ हा चित्रपट हिंदीमध्ये करायचा होता. तेव्हा मी १४-१५ वर्षांचा असेन. त्यांना तो चित्रपट हरीभाईंबरोबर म्हणजेच संजीव कुमार यांच्याबरोबर बनवायचा होता. त्यासाठी त्यांना एक ट्रायल ठेवली होती,” असं सचिन पिळगांवकर यांनी रेडिओ सिटीला दिलेल्या मुलाखतीत सांगितलं.
संजीव कुमार घरी आले अन्…
पुढे ते म्हणाले, “हरीभाईंनी ट्रायलमध्ये पूर्ण सिनेमा पाहिला. सिनेमा पाहून बाहेर आले. सायंकाळचे सात वाजले होते. त्यांनी विशूराजेला विचारलं सचिन कुठे राहतो माहीत आहे का? ते म्हणाले ‘मला माहिती आहे’. मग ते म्हणाले, ‘मला घेऊन जाता का त्याच्याकडे…’ ते लगेच म्हणाले, ‘हो चला.’ ते गाडीत बसले. जाताना सांताक्रुझमध्ये एका स्टेशनरी शॉपजवळ हरीभाईंनी गाडी थांबवली. एक ऑटोग्राफ बुक घेतलं. एक पेन विकत घेतला आणि ते घरी आले. दार वाजवलं, वडिलांनी दरवाजा उघडला तर समोर संजीव कुमार उभे होते. ते म्हणाले, ‘हरीभाई आतमध्ये या’. त्यांनी विचारलं ‘सचिन आहे का? बोलवा त्याला’. ते हॉलमध्ये बसले. मी आलो… त्यांनी सांगितलं ‘मी आताच हा माझा मार्ग एकला चित्रपट पाहून आलोय. मी आयुष्यात कोणाचा ऑटोग्राफ घेतला नाही. मी आयुष्यातील पहिला ऑटोग्राफ घेऊ तुझा घेऊ इच्छित आहे’. त्यानंतर त्यांनी माझ्यासमोर ऑटोग्राफ बुक ठेवलं आणि मला पेन दिला. मी त्यांना ऑटोग्राफ दिला. मी लिहिलं, ‘हरीभाऊ विथ लव्ह.. सचिन…’, तो पहिला ऑटोग्राफ मी आयुष्यात कधीही विसरणार नाही.”
सचिन पिळगांवकर यांनी पहिला ऑटोग्राफ कुणाचा घेतला होता?
सचिन पिळगांवकर यांनी पहिला ऑटोग्राफ एका अभिनेत्रीचा घेतला होता याबद्दल ते म्हणाले, “मी आयुष्यातील पहिला ऑटोग्राफ घेतला तेव्हा फार लहान होतो. कदाचित मी वहीवर ऑटोग्राफ घेतला होता. माझ्याकडे त्याकाळी ऑटोग्राफ बुक वगैरे काही नव्हतं. मला आठवतंय मी अभ्यास करण्यासाठी ती वही घेऊन गेलो होतो. राजकमल स्टुडिओमध्ये मधुबाला शूटिंग करत होत्या. तेव्हा माझं वय सात वर्षे होतं. मी टॅक्सीतून बाहेर पडलो. राजकमल स्टुडिओमध्ये मी गेलो. आम्ही कधीही एकत्र काम केलं नाही, पण मी त्यांना मधू आंटी (मधुबाला) म्हणून हाक मारली आणि पळालो. त्यांनी माझ्याकडे पाहिलं आणि बोलावलं, मग मी तिथे गेलो आणि त्यांना मिठी मारली. मी म्हटलं मधुआंटी एक मिनीट, मी पुस्तक आणि पेन काढला आणि म्हटलं एक ऑटोग्राफ द्या. त्या म्हणाल्या, ‘तुला पाहिजे माझा आटोग्राफ, मग त्यांनी ऑटोग्राफ दिला. ऑटोग्राफ देताना मी खाली पाहिलं. मला त्यांचे पाय दिसले. त्या जितक्या सुंदर होत्या, त्याच्या १० पटीने त्यांचे पाय सुंदर होते. असे पाय मी आयुष्यात कधी बघितले नाहीत,” असं सचिन पिळगांवकर म्हणाले.
