ब्रिटनच्या राजघराण्यातील प्रिन्स हॅरी आणि अमेरिकन अभिनेत्री मेगन मार्कल यांच्या विवाहसोहळ्याचीच चर्चा गेल्या काही दिवसांपासून सर्वत्र सुरु आहे. मोठ्या दिमाखात आणि राजेशाही थाटाला साजेशा अंदाजात पार पडलेल्या या विवाहसोहळ्यात बऱ्याच मान्यवर अतिथींची उपस्थिती पाहायला मिळाली. या शाही विवाहसोहळ्यात मुख्य आकर्षणाचा विषय ठरला तो म्हणजे प्रिन्स हॅरी, मेगन मार्कल आणि इतर सर्वच आमंत्रितांचा पोषाख. शाही विवाहसोहळा म्हटल्यावर तिथे पोषाखाच्या बाबतीतही काही शिष्टाचार पाळावे लागतात, ज्याची सुरेख झलक सर्वच उपस्थितांकडून पाहायला मिळाली. जवळपास आठशे आमंत्रितांच्या या गर्दीत 'देसी गर्ल' प्रियांका चोप्राची हजेरीसुद्धा पाहायला मिळाली. सेलिब्रिटी स्टायलिस्ट मिमी कटरेलने डिझाइन केलेल्या लूकमध्ये प्रियांकाने या विवाहसोहळ्याला हजेरी लावली. लिलॅक विविअॅने वेस्टवूड आऊटफिटमध्ये ती अत्यंत सुरेख दिसत होती. तिच्या या लूकची अनेकांनीच प्रशंसाही केली. पण, त्याचवेळी देसी गर्लच्या या लूकवर टीकाही झाली. समता पार्टीच्या माजी अध्यक्षा जया जेटली यांनी प्रियांकाने शाही विवाहसोहळ्यात साडी नेसून हजेरी न लावल्यामुळे निराशा व्यक्त केली. त्यांच्या या ट्विटनंतर नेटकऱ्यांनी मात्र या 'देसी गर्ल'ची बाजू मांडत तिची पाठराखण केल्याचं पाहायला मिळालं. आंतरराष्ट्रीय मनोरंजन विश्वामध्ये फक्त बॉलिवूडच नव्हे, तर हॉलिवूडमध्येही आपल्या देशाचं प्रतिनिधीत्त्व करणाऱ्या प्रियांकाचा आपल्याला अभिमान वाटत असल्याचं म्हणत तिने काहीही अयोग्य केल्याचं मत सोशल मीडियाच्या माध्यमातून अनेकांनी मांडलं. त्याशिवाय तिच्या पोशाखावरुन अशी प्रतिक्रिया देणं पूर्णपणे चुकीचं असल्याचंही अनेक पोस्टमधून स्पष्ट झालं. फक्त मनोरंजनच नव्हे तर, युनिसेफसारख्या संस्थेतर्फेही सामाजिक कार्यात हातभार लावत प्रियांका आपल्या देशाचं नाव उज्वल करत आहे. त्यामुळे तिच्यावर फक्त कपड्यांच्या मुद्द्यावरुन होणारी टीका चुकीची असल्याचंच मत अनेकांनी मांडलं. She was the only indian in #RoyalWedding2018 I guess , you should be proud of her but aunties like you only criticize. — Aditii (@Sassy_Soul_) May 20, 2018 वाचा : प्रिन्स हॅरी- मेगन मार्कलच्या शाही विवाहसोहळ्याचा खर्च नेमका आहे तरी किती?
