Video : मराठमोळ्या अभिनेत्रीने ‘अशी’ केली रस्त्यावर भाजी विकणाऱ्या आजोबांना मदत; म्हणाली, “बेंबीच्या देठापासून ते ओरडत होते अन्…”

राधिकान आपल्या इन्स्टाग्रामवर बाजारपेठेतील एका भाजीविक्रेत्याचा एक व्हिडीओ शेअर केला गेला आहे. हा व्हिडीओ शेअर करीत तिने लिहिले, “दिवस मोठा होता. काल प्रभू श्रीराम आले. सर्वत्र आनंद ओसंडून वाहत होता. एका कोपऱ्यात हे आजोबा बेंबीच्या देठापासून ४० रुपयांना एक जुडी विकायचा प्रयत्न करीत होते. त्यांचा आवाज काही सेकंद माझ्या कानांत घुमत राहिला. एकीकडे नाटकाच्या प्रयोगाची पहिली घंटा वाजली होती; पण हे काम मला करायचं होतं. आजच. कोणतं? व्हिडीओ बघा”

राधिकाने पुढे लिहिले, “माझी आई म्हणते की, काही ठिकाणी भाव करायचा नाही; तर काही ठिकाणी भाव केल्याशिवाय काहीही विकत घ्यायचं नाही. संपूर्ण दुकान विकत घेतलं न भाव करता. पोटासाठी काम करणारे आजोबा आज पोटभर नक्की जेवतील याची सोय केली. दिवस रामाचा. काम रामाचं. एखाद्या नाटक सिनेमातला प्रसंग आठवला की, महाराज, अभिनंदन! राणी सरकारला मुलगा झाला. मग राजा कसलाही विचार न करता, त्याच्या गळ्यातली रत्नजडित माळ सुईणीला देतो. तसंच काहीसं. आनंद तर मलाही झाला होता प्रचंड. मीही राणी सरकार असल्यासारखा आनंद लुटला. दिसेल त्याला कोथिंबीर वाटत सुटले. नाटकातल्या कलाकारांनी माझ्या या कामाचं स्वागतच केलं आणि आनंदानं कोथिंबीर घरी नेली.”

हेही वाचा- शशांक केतकरने घेतलं नवं घर, स्वतः खुलासा करत म्हणाला “मला सोशल मीडियावर…”

राधिकाने पुढे सांगितले की, आईने जे सांगितलं ते माझ्या मुलीला मी सांगितलंच आहे; पण त्यात एक जुडी आणखीन जोडेन. “अंतरा, आयुष्यात काही दिवस असे येतील की, त्या दिवशी भाव करायचा नाही आणि चांगले काम केले हे सांगताना भाव खायचा नाही.” त्या आजोबांच्या घरी दिवाळी आली की नाही माहीत नाही; पण मी मात्र दिवाळी, अशी साजरी केली. कारण- दिवस मोठा होता. आणि मन मोठं का छोटं, ते कसं मोजता येईल? मनात राम होता आणि तो मनात घर करून राहिला. राधिकाची ही पोस्ट सोशल मीडियावर मोठ्या प्रमाणात व्हायरल झाली आहे. अभिनेता समीर चौघुलेने राधिकाच्या पोस्टवर, “त्या आजोबांचं निर्मळ हास्य ही तुझी कमाई,” अशी कमेंट करीत तिच्या कृतीचे कौतुक केले आहे.