बिग बॉस १६ वे पर्व संपल्यापासून मराठमोळा अभिनेता शिव ठाकरे हा चांगलाच चर्चेत आहे. शिव ठाकरे हा बिग बॉसचा विजेता ठरला नसला तरी त्याने सर्व प्रेक्षकांची मनं मात्र जिंकून घेतली. शिव ठाकरेने नुकतंच मनसे अध्यक्ष राज ठाकरे यांची भेट घेतली. या भेटीमागचे कारण काय, यावेळी नेमकी कशाबद्दल चर्चा झाली, याबद्दल शिव ठाकरेने सविस्तर भाष्य केले. शिव ठाकरे हा शनिवारी २५ फेब्रुवारी राज ठाकरेंच्या दादर येथील शिवतीर्थ या ठिकाणी पोहोचला. यावेळी त्याने राज ठाकरेंची आणि त्यांच्या संपूर्ण कुटुंबियांची भेट घेतली. या भेटीचे अनेक फोटो आणि व्हिडीओ व्हायरल झाले होते. त्यानंतर शिव ठाकरेने प्रसारमाध्यमांशी संवाद साधला. यावेळी शिव ठाकरेने या भेटीबद्दलची सविस्तर माहिती दिली.आणखी वाचा : “वीणा जगताप हा विषय संपलाय” शिव ठाकरेची आई स्पष्ट शब्दात म्हणाली “तिने लग्नाचा…” "राज ठाकरेंनी मला अभिनंदन करण्यासाठी बोलावले होते. ही माझ्यासाठी फार मोठी गोष्ट आहे. जेव्हा जेव्हा मराठी माणूस पुढे पाऊल टाकतो तेव्हा राज ठाकरे कायमच शाबासकी देतात आणि त्याची त्यावेळी खरंच खूप गरज असते. राज ठाकरेंनी मला त्यासाठीच बोलवलं होतं. यावेळी तिथे राज ठाकरेंच्या पत्नी, उर्वशी ठाकरे उपस्थित होत्या. त्या आमच्या बिग बॉसच्या खूप मोठ्या चाहत्या आहेत. राज ठाकरे हे मराठी मुलं किंवा मुली पुढे जात असतील तर नेहमीच त्यांना शाबासकी देत असतात आणि यापूर्वीही त्यांनी दिली आहे." "मला मराठीतील अनेक मोठ्या दिग्दर्शकांकडून खूप ऑफर आल्या आहेत. मला मराठी आणि हिंदी दोन्हीत काम करायचं आहे. मात्र सध्या मी 'खतरों के खिलाडी' साठी तीन महिन्यांसाठी बाहेर जातो आहे, त्याचे कॉन्ट्रॅक्ट आहे. मला सर्वकाही करायचे आहे. मी नेमकं काय काय करु असा प्रश्न मला पडलाय. ज्या गोष्टींची मी वाट पाहिली ते आता होत आहे. एका मराठी चित्रपटाचे शूटिंगही १० दिवसात सुरु होणार आहे. पण मी मराठीमध्ये प्राधान्याने काम करेन", असे शिव ठाकरेने यावेळी सांगितले. आणखी वाचा : “आम्हाला एकमेकांचं तोंड…” शिव ठाकरेने सांगितलं वीणा जगतापशी ब्रेकअप करण्यामागचं खरं कारण दरम्यान यावेळी शिव ठाकरेला राज ठाकरे, मनसे आणि निवडणूक याबद्दलही प्रश्न विचारण्यात आले. त्याची त्याने फार सविस्तरपणे उत्तर दिली. बिग बॉस १६ च्या टॉप ५ स्पर्धकांमध्ये एमसी स्टेन, शिव ठाकरे, प्रियांका चहर चौधरी, अर्चना गौतम आणि शालीन भानोट होते. या पाच जणांमध्ये एमसी स्टॅनला सर्वाधिक मतांनी विजयी ठरला. त्याला बिग बॉसची ट्रॉफी, ३१ लाख आणि गाडी देण्यात आली.
