Ratris Khel Chale 2 Fame Actress Welcome Baby Boy : झी मराठीवर प्रसारित होणाऱ्या ‘रात्रीस खेळ चाले’ या मालिकेचे तीनही भाग खूप मोठ्या प्रमाणात गाजले. प्रत्येक भागावर प्रेक्षकांनी भरभरून प्रेम केलं. मालिकेचे तीनही सीझन सुपरहिट ठरलेच; पण त्यातील कलाकारांनाही चांगली लोकप्रियता मिळाली. आता मालिका संपून इतके दिवस झाले असले तरीही या मालिकेची आणि कलाकारांची लोकप्रियता काही कमी झालेली नाही.
मालिकेतील अनेक कलाकार सोशल मीडियाद्वारे चाहत्यांच्या संपर्कात राहत असतात. सोशल मीडियाद्वारे हे कलाकार त्यांच्या आयुष्यातील काही खास घटना, प्रसंग शेअर करीत असतात. अशातच ‘रात्रीस खेळ चाले’च्या दुसऱ्या पर्वातील लोकप्रिय अभिनेत्रीने आई झाल्याची गुड न्यूज आपल्या चाहत्यांबरोबर शेअर केली आहे आणि ती अभिनेत्री म्हणजे मंगल राणे.
मंगल राणेने या मालिकेत शोभा हे पात्र साकारलं होतं. तिची ही भूमिका खूप गाजली. या मालिकेत तिनं साकारलेलं भूत प्रेक्षकांना चांगलंच घाबरवायचंय. मंगल सोशल मीडियावर बऱ्यापैकी सक्रिय असते. सोशल मीडियाच्या माध्यमातून ती तिच्या आयुष्यातील अपडेट्स शेअर करत असते. अशातच तिनं आई झाल्याची गुड न्यूज शेअर केली आहे.
मंगलनं सोशल मीडियावर आईबरोबरचा हॉस्पिटलमधील फोटो शेअर केला आहे, ज्यात मंगलच्या आईनं मांडीवर मंगलच्या बाळाला घेतलं आहे. हा फोटो शेअर करीत मंगल असं म्हणते, “लेक जेव्हा आई होते, तेव्हा लेकीबरोबर आईसुद्धा नव्यानं आईपण जगते.”
गेल्या महिन्यात म्हणजेच ३ ऑगस्ट रोजी मंगलला पुत्ररत्न प्राप्त झालं असून, साधारण महिनाभरानंतर मंगलनं ही आनंदाची बातमी आपल्या चाहत्यांबरोबर शेअर केली आहे. “आमचा लाडोबा”, असं म्हणत तिनं मुलगा झाल्याचा आनंद व्यक्त केला आहे.
मंगल राणे इन्स्टाग्राम पोस्ट
गेल्या वर्षी म्हणजेच २०२४ मध्ये मंगलनं फोटोग्राफर असलेल्या संतोष पेडणेकरबरोबर लग्न केलं. या लग्नसोहळ्याचे खास क्षण तिनं आपल्या सोशल मीडियाद्वारे शेअर केले होते. तसंच या वर्षी जून महिन्यात मंगलचा डोहाळजेवणाचा (Baby Shower) कार्यक्रम पार पडला. त्याचे खास फोटोही तिने चाहत्यांबरोबर शेअर केले होते. अशातच आता अभिनेत्री आईसुद्धा झाली आहे.
मंगल राणे इन्स्टाग्राम पोस्ट
दरम्यान, मंगलच्या कामाबद्दल बोलायचं झाल्यास, तिनं झी मराठीच्याच ‘गाव गाता गजाली’, ‘रात्रीस खेळ चाले २’, ‘क्षेत्रपाल श्री देव वेतोबा’, ‘संत गजानन शेगावीचे’ अशा लोकप्रिय मालिकांमधून प्रेक्षकांचं मनोरंजन केलं आहे. तसंच ती ‘रेडू’ या सिनेमातूनही प्रेक्षकांच्या भेटीस आली आहे.
