अभिनेत्री सायली संजीव आणि स्पृहा जोशी या मराठी मनोरंजन सृष्टीतील दोन आघाडीच्या अभिनेत्री म्हणून ओळखल्या जातात. त्या दोघींनी आतापर्यंत कधीही एकत्र स्क्रीन शेअर केलेला नसला तरीही त्यांच्यात खूप घट्ट मैत्री आहे. त्यांची ही मैत्री सोशल मीडियावरून अनेकदा समोर येत असते. आता स्पृहाने त्या दोघींमधलं एक गुपित उघड केलं आहे.
वयाने, अनुभवाने स्पृहा सायलीची सीनियर आहे. पण तरीही त्या दोघीही एकमेकींना ताई अशी हाक मारतात. एकमेकींच्या पोस्टवर देखील त्यांची ही कमेंट अनेकदा पाहण्यात येते. आता त्या एकमेकींना ताई का म्हणतात याचे उत्तर स्पृहाने ‘सेलिब्रिटी कट्टा’ला दिलेल्या मुलाखतीत दिलं.
आणखी वाचा : “मी ज्यांना प्रपोज केलं त्यांनी…”; सायली संजीवचा प्रेमाबद्दल मोठा खुलासा
स्पृहाने नुकतीच ‘झी चित्र गौरव पुरस्कार’ सोहळ्याला हजेरी लावली होती. तर याच पुरस्कार सोहळ्यात सायली संजीवही उपस्थित होती. त्या दोघींमधलं बॉण्डिंग पाहून “तुम्ही दोघी एकमेकींना ताई का म्हणता?” असा प्रश्न स्पृहाला विचारण्यात आला. त्याचं उत्तर देताना ती म्हणाली, “ते आमचं आमचं सिक्रेट आहे आणि आत्ता आम्ही ते सगळ्यांना नाही सांगणार. पण त्याही माझ्या ताई आहेत आणि मीही त्यांची ताई आहे.”
आता स्पृहाचं हे उत्तर खूपच चर्चेत आलं असून त्या दोघी एकमेकींना ताई का म्हणतात जाणून घेण्यासाठी त्यांचे चाहते खूप उत्सुक झाले आहेत.
