मला आणि बाबांना शाहरुख आवडला नव्हता- आदित्य चोप्रा

‘डर’ या चित्रपटाच्या वेळी शाहरुखची निवड करण्यामध्ये काहीसा धोका होता असे आदित्यच्या म्हणण्यातून स्पष्ट होत आहे. ‘आम्ही ज्यावेळी ‘डर’ या चित्रपटासाठी त्याची निवड केली तेव्हा मी खरं सांगतो, बाबांना आणि मला शाहरुख अजिबात आवडला नव्हता. त्यावेळी शाहरुख राकेश रोशन यांच्या ‘किंग अंकल’ या चित्रपटामध्ये व्यग्र होता. त्यानंतर तो आमच्या हाती लागला होता. त्याच्यामुळे आम्ही कोणीही प्रभावित झालो नव्हतो. कदाचित त्याला सगळेच नाकारत असल्यामुळे आम्ही संधी दिली होती’, असे आदित्य चोप्रा म्हणाल्याचे वृत्त डीएनए या वृत्तपत्राने प्रसिद्ध केले आहे.

आदित्यच्या या वक्तव्यामुळे सध्या अनेकांच्याच भुवया उंचावल्या असून बॉलिवूड विश्वामध्ये विविध चर्चांना उधाण आले आहे. पण, पहिल्याच भेटीमध्ये इतरांना प्रभावित न करु शकणाऱ्या किंग खानच्या कारकीर्दीचा चढता आलेख पाहिला तर त्याचा हेवा वाटल्यावाचून राहणार नाही. पहिल्याच भेटीत यशराज मधील महत्त्वाच्या व्यक्तींवर फारसा प्रभाव पाडू न शकणाऱ्या शाहरुखचे आणि यशराज बॅनर्सचे नाते शब्दांत व्यक्त करणे तसे अशक्यच आहे.

गेल्या कित्येक वर्षांपासून विविध भूमिकांच्या माध्यमातून चाहत्यांच्या मनात घर करुन असलेला किंग खान त्याच्या ‘द रिंग’, आणि ‘डिअर जिंदगी’ या चित्रपटांमध्ये व्यग्र आहे. ‘डिअर जिंदगी’ या चित्रपटामध्ये शाहरुख खान, आलिया भटट्, कुणाल कपूर हे कलाकार महत्त्वाच्या भूमिकेत झळकणार आहेत. तर, ‘द रिंग’ या चित्रपटाच्या निमित्ताने शाहरुख खान आणि अनुष्का शर्मा ही जोडी पुन्हा एकदा प्रेक्षकांच्या भेटीला येणार आहे.