मुंबई : पवई परिसरात अतिक्रमणविरोधी कारवाईदरम्यान पोलीस आणि मुंबई महानगरपालिका अधिकाऱ्यांवर स्थानिक रहिवाशांनी दगडफेक केल्याची घटना गुरुवारी घडली. याप्रकरणी पवई पोलीस ठाण्यात दोन गुन्हे दाखल करण्यात आले आहेत. याप्रकरणी आतापर्यंत एकूण ५७ जणांना अटक त्यात सहा महिलांचा समावेश आहे. याशिवाय १५ महिलांना नोटीस देण्यात आली आहे.
या जमावाने तेथील महिलेच्या घरावरही हल्ला केल्याचा आरोप असून त्यात एक तीन वर्षांची मुलगी जखमी झाली. त्याप्रकरणी दुसरा गुन्हा दाखल करण्यात आल्याचे अधिकाऱ्याने सांगिगतले. पवईच्या जय भीम नगर भागात पालिकेच्या एस विभाग कार्यालयामार्फत अतिक्रमण हटवण्याबाबत ३ जून रोजी नोटीस देण्यात आली होती. त्यानुसार पालिका अधिकारी, कर्मचारी ६ जून रोजी कारवाई केली. यासाठी पवई पोलिसांकडून पालिकेने मागितलेला बंदोबस्तही पुरविण्यात आला होता. मात्र या वेळी पोलिसांवरच स्थानिकांनी दगडफेक करायला सुरुवात केली. दगडफेकीच्या वेळी पोलिसांनी जमावाला पांगवण्याचा प्रयत्न केला. मात्र नागरिकांनी दगडफेक सुरूच ठेवल्याने पोलिसांना अखेर सौम्य लाठीचार्जही करावा लागला.
महिलेच्या घरावर हल्ला
याशिवाय परिसरात राहणाऱ्या महिलेने बांधकाम व्यवसायिकासोबत समझोता केल्याच्या आरोपाखाली जमावाने आशा चौरे या महिलेच्या घरावरही दगडफेक केली. त्यात चौरे यांच्या बहिणीच्या तीन वर्षांच्या मुलीला दगड लागल्यामुळे ती जखमी झाली. याप्रकरणी पवई पोलिसांनी २८ जणांविरोधात गुन्हा दाखल केला आहे. आरोपींनी दगड व लाठ्याकाठ्यांनी महिलेच्या घरावर हल्ला केला असून त्या हस्तगत करण्यात आल्याचे अधिकाऱ्याने सांगितले.
