“मुंबईकरांचा पैसा लुबाडून माजी नगरसेवक खरेदीसाठी वापरले”, भुयारी मेट्रोची वाताहत पाहून आदित्य ठाकरेंचा संताप

“स्वतःला इन्फ्रा मॅन असं म्हणवून घेणारे, व्हिजनरी म्हणणारे, ग्रीन कार्पेट अंथरून नालेसफाईची पाहणी करणारे कुठे आहेत?” असा प्रश्न उपस्थित करत आदित्य ठाकरे यांनी नाव न घेता उपमुख्यमंत्री एकनाथ शिंदे यांना टोला लगावला आहे. ते म्हणाले, “पालिकेचा खाल्लेला पैसा माजी नगरसेवकांना फोडण्यात, पदाधिकारी विकत घेण्यासाठी वापरला जात आहे. हा मुंबईकरांचा पैसा आहे”.

“पालिकेने वरळी मेट्रो स्थानकात आणीबाणी लावली आहे”

आदित्य ठाकरे म्हणाले, “दोन आठवड्यांपूर्वी वरळीतील भुयारी मेट्रोच्या स्थानकाचं उद्घाटन करण्यात आलं होतं. मात्र आज त्या स्थानकाची अवस्था बघा. आपल्याला आत जाऊ दिलं जात नाही. कारण आत काय झालंय, किती नुकसान झालंय ते त्यांना आपल्याला पाहू द्यायचं नाही. पालिकेने आणीबाणी लावली आहे. आपल्याला बाहेर तिथे बराच राडारोडा दिसतोय. ही मेट्रो वापरणं किती धोकादायक आहे ते दिसतंय. आतमध्ये काही कोसळलं आहे का ते त्यांनी सांगायला हवं”.

मुंबईकर या भाजपावर कधीच विश्वास ठेवू शकत नाही : आदित्य ठाकरे

शिवसेना (ठाकरे) आमदार म्हणाले, “मुंबईच्या हिंदमाता परिसरात नेहमी पूर येतो. मात्र, आम्ही २०२२ मध्ये हा परिसर फ्लड फ्री (पूर मुक्त) केला होता. आज तिथेही मोठ्या प्रमाणात पाणी साचलंय. आम्ही त्यावेळी या भागात पूर नियंत्रण योजना राबवली होती. आता मात्र हिंदमाता परिसर तुंबला आहे. मुंबईतील रस्ते खचले आहेत. भाजपाची केंद्रात व राज्यात ११ वर्षांपासून सत्ता आहे. सर्व यंत्रणा मुख्यमंत्री कार्यालय व नगरविकास खात्याच्या कार्यालयातून चालते. मात्र ही कार्यालये व यंत्रणा किती भ्रष्ट आहे ते आजच्या पावसाने दाखवून दिलं आहे. मुंबईकर या भाजपावर कधीच विश्वास ठेवू शकत नाही”.