‘असुरक्षित नगरसेविकां’साठी विरोधकांनी प्रतिसभागृह भरवले

नगरसेविकांच्या आरोपांवर चर्चा करायला महापौरांनी पुन्हा एकदा नकार दिल्यावर विरोधकांनी महापौरांची हुर्यो करत सभात्याग केला आणि प्रतिसभागृह भरवले. या प्रतिसभागृहात नगरसेविकांनी आरोप केलेल्या व्यक्तींना २४ तासांत अटक करण्याचे निवेदन पोलीस आयुक्तांना देण्याचा प्रस्ताव मंजूर करण्यात आला. त्यानंतर विरोधी पक्षनेते देवेंद्र आंबेरकर, धनंजय पिसाळ, रईस शेख व संदीप देशपांडे यांनी पोलीस आयुक्त सत्यपाल सिंग यांची भेट घेतली.
नगरसेविकांच्या प्रश्नावरून गेली तीन सभागृहे तहकूब झाल्यानंतर शुक्रवारच्या सभागृहाचे कामकाज चालवण्यासाठी महापौरांनी गटनेत्यांची बैठक बोलावली होती. मात्र महापौर निवेदन करीत नाहीत, तोपर्यंत सभागृहाचे कामकाज बंद ठेवण्याचा निर्णय विरोधकांनी घेतला.
नगरसेविकांच्या बाबतीत पोलिसांकडून चौकशी सुरू असून दोषी आढळल्यास संबंधितांवर कारवाई केली जाईल. नगरसेविका, मनपाच्या महिला कर्मचारी किंवा शहरातील कोणत्याही महिलेवर अन्याय होत असेल तर हे सभागृह त्यांच्या पाठीशी उभे राहील, असे निवेदन महापौरांनी केले. मात्र हे संदिग्ध निवेदन मान्य न झाल्याने विरोधकांनी घोषणाबाजी सुरू केली. पालिकेतील प्रस्ताव हवेत उडवले गेले. ही बोलायची पद्धत आहे का, असा सवाल महापौरांनी करताच विरोधकांचा आवाज अधिकच चढता. त्यावेळी काही सत्ताधारी नगरसेवक बाह्या सरसावत पुढे झाले. त्यांचे फोटो विरोधक काढू लागल्यावर महापौरांनी  विरोध केला. मात्र, नगरसेविका आरोप करताना सत्ताधारी त्याचे चित्रीकरण करतात, त्याचे काय, असा खोचक प्रश्न विरोधकांनी विचारला.
या सर्व गदारोळातच महापौरांनी प्रस्ताव पुकारण्यास सुरुवात केली व ते मान्यही करून घेतले. बेस्टच्या अर्थसंकल्पाची चर्चा सुरू झाल्यावर बाहेर पडलेल्या नगरसेवकांनी व्हरांडय़ातच प्रतिसभागृहाची स्थापना केली. त्यात आंबेरकर यांना महापौर तर, मनसेचे संदीप देशपांडे यांना विरोधी पक्षनेते व पालिका आयुक्तपदी काँग्रेसचे प्रवीण छेडा यांना निवडण्यात आले.