भाऊ पाध्येकृत ‘डोंबाऱ्याचा खेळ’ पुन्हा रंगणार!

खास करून पाध्ये, ढसाळ आणि नारायण सुर्वे यांनी मुंबईचे रसरशीत, तसेच भगभगीत दर्शन रसिकांना घडवले. म्हणूनच ‘डोंबाऱ्याचा खेळ’ ही कांदबरी महत्त्वाची ठरते. डांगे-रणदिवे यांच्या नेतृत्वाखाली वैचारिकदृष्टय़ा प्रगल्भ झालेला मुंबईचा कामगार त्या काळात अनेक लढे देत होता. त्याचप्रमाणे सांस्कृतिक क्षेत्रातही आपले वर्चस्व राखून होता. मुंबई आणि कामगार यांचे एक अतूट असे नाते होते. पाध्ये या पर्वाचे साक्षीदार म्हणूनच ‘डोंबाऱ्याचा खेळ’मध्ये कामगारांच्या स्थितीच्या संघर्षमय जीवनाचा वृत्तांत लिहिताना त्यांच्या लेखणीला एव वेगळीच धार चढते.
कामगारांच्या जीवनाला संघर्ष वेढलेला असतो. संप, मोर्चे, थालीसभा, गेटसभा, कारणे दाखवा नोटीस, पगारात कपात, नोकरीत कपात अशा घटनांचा त्याला नित्याने सामना करावा लागतो. याच दरम्यान कामगार युनियनमुळे आपले दिवस सुधारतील असे स्वप्न बाळगून ते जगत असतात. यादरम्यान घडणाऱ्या चळवळीचे जिवंत चित्रण पाध्ये यांच्या लेखणीतून सिद्ध झाले आहे. मूलभूत वृत्ती-प्रवृतीचे चित्रण करण्यासह अनेक भावनांच्या पूर्तीसाठी सबंध चळवळ कशी चालते, याचे भेदक, भोचक चित्रण डोंबाऱ्याचा खेळ या कादंबरीच्या पानोपानी वाचकांना उलगडत जाते.

आपल्या कांदबरीतून मुंबईतील व्यक्तिजीवनाचा सम्रग वेध भाऊ पाध्ये यांनी घेतला आहे. सर्व स्थरातील व्यक्तींचे जीवन चित्रण त्यांच्या सहित्यात येते. त्यामुळे त्यांची पुस्तके पुर्नमुद्रित आम्ही करत आहोत. डोंबाऱ्याचा खेळ येत्या काही महिन्यांत वाचकांच्या हाती पडेल.
येशू पाटील, प्रकाशक, शब्द पब्लिकेशन